Presidente di Parlamento, sr. Ady Thijsen, a demostra grandesa y a pone su propio interpretacion un banda pa bienestar general. Den un rueda di prensa Ady a enfatisa cu e decision pa retira Minister Lopez-Tromp a cana su caminda entama pa Gobierno di Aruba y siman pasa diahuebs Parlamento a duna su sentimento pa loke ta trata e intencion di Gobernador pa retira e minister en cuestion y su retiro a keda concretisa.
Pero como Presidente di Parlamento, sr. Ady Thijsen, ta consciente cu a keda un discucion den comunidad encuanto e mocion di desconfiansa contra Lopez-Tromp. Tin un discusion di interpretacion andando cu segun Ady mester yega na un final. Ta prome biaha den historia cu e situacion aki ta surgi den sentido cu ta aplica art. 27 di Reglement van Orde den momento di votacion. Esaki sigur a trece hopi discucion y intrankilidad den comunidad y a touch nos estado di derecho.
Ta subraya cu e ta keda para riba su interpretacion, mirando su experticio, den e caso specifico aki pero cu e ta respeta otro opinion al respecto.
Na mes momento e ta asumi su responsabilidad y pa bienestar di e institucion Parlamento e la tuma un decision.
Su opinion ta cu na e momento aki interes general ta bay prome cu tur cos! Nos mester tin stabilidad y trankilidad den nos comunidad. Pa e motibo aki e la dicidi pa declara e mocionnan tuma durante reunion di dia 15 di october nulo. Esaki un biaha mas den cuadro di interes general, stabilidad y pa trece trankilidad bek den nos comunidad.
Mas cu claro esaki ta determina tambe e punto di bista cu ta wordo manteni awor y pa futuro. Segun Ady e rechtszekerheid di e instituto Parlamento mester wordo salvaguardia prome cu tur cos y su interpretacion, decision ta ondergeschikt na e interes general.
Adicionalmente Ady a bisa bon cla cu e investigacion di menasa contra su persona y e caso di aangifte di valse beschuldiging contra Lopez-Tromp ta keda cana su caminda.
Pa finalisa Ady a haci un apelacion serio na pueblo en general, sea bo ta minister, parlamentario, ambtenaar of ciudadano, si bo tin prueba di actonan di corupcion entrega esakinan na OM. No papia of insinua pero asumi bo responsabilidad y entrega keho!
Fraccion di MEP ta para tras di e decision di Presidente di Parlamento y ta respeta e grandesa di Presidente di Parlamento pa den e caso aki pone un fin tras di e discusion den interes general di Aruba. Aruba mester di trankilidad, pa Gobierno y Parlamento por sigui atende cu e crisis y cu e negosacion cu Hulanda pa financiamento.
