Cu e meta di sigui traha pa un comunidad mas fuerte y uni, Centro di Bario Noord (CBN), den colaboracion cu Grace Family Ministries y Grace Christian University di Grand Rapids, Michigan (Estados Unidos), ta invita tur mucha di Noord y nan mayornan pa participa den un programa especial di tres dia bou di e tema “Norma y Balornan pa un Futuro Fuerte!”.
E actividad ta alinea cu e vision di Centro di Bario Noord pa stimula e desaroyo spiritual, social, cultural y deportivo di e comunidad. Durante tres mainta consecutivo, mucha entre 6 y 15 aña lo haya e oportunidad pa participa den diferente actividadnan creativo, educativo y recreativo cu no solamente ta entretene, sino cu tambe ta contribui na nan crecemento personal.
E programa ta tuma luga riba dias 29, 30 y 31 di juli 2026, for di 9:00 di mainta te cu 12:00 di merdia, na Centro di Bario Noord. Tur mucha den e categoria di edad menciona ta bon bini pa comparti, siña y crea amistadnan nobo den un ambiente sano y positivo.
Segun e organisadornan, e iniciativa tin como meta principal pa fortalece e balornan fundamental cu ta forma un base solido pa e futuro di nos hobennan. Den un mundo cu ta cambia rapidamente, ta importante pa mucha siña for di un edad hoben tocante respet, responsabilidad, colaboracion, honestidad y e importancia di trata otro cu dignidad.
Durante e tres dianan, e participante nan lo por disfruta di un programa varia cu ta combina enseñansa cu diversion. Entre e diferente actividadnan tin drama, unda mucha por expresa nan creatividad y desaroya confiansa den nan mes; deporte y wega cu ta stimula movemento, cooperacion y disciplina; obra di man pa desarroya habilidad creativo y coordinacion; musica y canto pa fomenta sentido di ritmo, expresion artistico y trabou den grupo; y sesionnan dedica na formacion di caracter y balornan, enfoca riba e importancia di tuma bon decisionnan y biba den armonia cu otro.
Ademas di desaroya talento, e actividadnan ta contribui na mehora concentracion, fortalece e habilidad di traha den ekipo y promove amistad entre mucha di diferente scol y bario. E organisadornan ta kere cu actividadnan positivo manera esaki ta crea oportunidad pa mucha desaroya confiansa den nan mes y sinti nan mes aprecia como miembro importante di nan comunidad.
E colaboracion entre Centro di Bario Noord, Grace Family Ministries y Grace Christian University ta representa un compromiso comun pa inverti den e proximo generacion. Cu e combinacion di experiencia educativo, spiritual y comunitario, e organisacionnan ta spera di laga un impacto positivo cu lo sigui refleha den bida di e participante nan aya despues cu e programa a termina.
Mayornan y cuidadonan ta wordo anima pa registra nan yiu pa e actividad y duna nan e oportunidad di pasa tres mainta yen di enseñansa, amistad y gozo. E programa ta un invitacion pa descubri talento, fortalece caracter y pone balornan positivo den practica. Registracion ta bay via + 297 568-2935.
Cu e lema “Noord Creciendo Hunto,” Centro di Bario Noord ta reafirma su compromiso pa sigui traha hunto cu partnernan local y internacional pa construi un comunidad mas fuerte, cu mucha prepara pa enfrenta e futuro cu respet, balor y confiansa.
—Noord Creciendo Hunto!
