Introduccion di BBO na frontera a yama atencion di Aruba Hotel and Tourism Association (AHATA). CEO di AHATA, Tisa LaSorte ta indica cu pa varios aña ta papia di e beneficio di por cambia nos sistema di impuesto pa un sistema indirecto. Te ainda ta parce cu tur hende ta di acuerdo cu e miho manera ta pa cambia pa un sistema indirecto, sinembargo esaki tabata un di e condicionnan poni tambe den e landspakket.
Aruba ya caba tin basta tempo ta papia di dje. Despues di varios analisis mayoria di e representantenan di comercio manera AHATA ta di acuerdo cu e miho sistema pa Aruba lo ta den un sistema simpel, pero un bon sistema di BTW. Segun CEO di Aruba Hotel & Tourism Association Tisa LaSorte un BTW lo ta e miho sistema pa implementa na momento cu ta hala pa un sistema indirecto.
Segun CEO di AHATA Tisa LaSorte te na e momentonan aki den e anuncionan ta tende di e BBO na frontera y den algun reunion tambe a keda presenta algun informacion di BBO na frontera. Tambe por a tuma nota di e conferencia di prensa nan cu a tuma luga ta papia di BBO na frontera ta un stap na caminda pa un BTW.
CEO di Aruba Hotel & Tourism Association Tisa LaSorte ta kere cu si BBO na frontera ta un stap pa e BTW y si e intencion ainda ta pa yega na un BTW un dia, e miho manera ta pa modele mas cerca posibel di e BTW. E manera cu ta diseña awo pa e BBO na frontera y e BTW ta, cu den un sistema di BTW lo por a trek af tur e gastonan di BBO cu ta wordo paga na frontera di e BTW cu ta wordo colecta di e benta.
Di e manera cu e BBO na frontera ta awo esey no ta e caso. Segun CEO di Aruba Hotel & Tourism Association, Tisa LaSorte awo e ta hopi limita ken y kico por wordo kita di e bentanan, dus ta limita comerciantenan di kico nan por kita y esey kiermen cu nan gastonan ta subi.
CEO di Aruba Hotel & Tourism Association Tisa LaSorte ta duna un ehempel di un pacus cu ta bende buki, segun LaSorte e pacus cu ta bende buki na momento cu e importa buki di afo pa e bende na su clientenan e por trek af su gasto di BBO na momento cu e la importa y por trek e af di e BBO cu despues e ta colecta di su clientenan unda cu e ta paga e ora na gobierno.
Segun CEO di Aruba Hotel & Tourism Association Tisa LaSorte den henter e proceso aki loke cu no por ser kita ta porehempel e rekinan cu e comerciante ta bay cumpra pa e por pone den su shop , esey e no por trekaf, aki ta caminda e gastonan ta subi.
Sinembargo den un sistema di BTW tur esey por a trek af, esaki ta e diferencia grandi cu ta sinti cu no ta wordo splica completamente, Segun CEO di AHATA Tisa LaSorte. Den tur e proceso aki e gasto ta subi pa e comerciante. E comerciante ta pone su prijs y na momento cu e mester tuma un decision e ta mira tur su gastonan y e ta mira un margen cu e mester por gana. Loke cu ta un realidad ta cu tur e impuesto ta gastonan di e compania, si mester hisa e gasto di e compania cu 7% di e BBO na frontera esey kiermen cu e prijs ta bay subi y e mester subi su prijs pa e por cubri e margen.
1 comment
[…] Source link […]