Durante e simposio organisa pa Soroptimist International na Educampus, orador Clementia Eugene a presenta riba e topico “Intergenerational Trauma.” Den su presentacion, Eugene a pone enfasis riba un aspecto cu segun Eugene hopi biaha no ta keda suficientemente tuma na cuenta: e trauma cu ta pasa di un generacion pa otro.
Segun Eugene, hopi hende muhe a crece cu e idea cu nan mester mustra fuerte tur ora, sin laga espacio pa procesa nan propio dolo y experencianan. Sinembargo, e proceso di reconoce y compronde e traumanan aki ta esencial pa logra sanacion.
Eugene a splica cu e meta di trata e topico di intergenerational trauma ta pa yuda hende muhe haña e herramientanan necesario pa nan por compronde nan situacion y cuminsa e proceso di healing. Segun Eugene, ora un hende logra reconoce e origen di su traumanan, e por cuminsa traha riba nan bienestar emocional y mental.
Durante su presentacion, Eugene a anima e audiencia pa duna mas atencion na nan mes y no sinti presion pa semper mustra fortalesa, sino pa permiti nan mes pasa pa un proceso di sanacion y crecemento personal.
E simposio a forma parti di un mainta di educacion y consciencia riba diferente aspecto di trauma y bienestar, cu a logra atrae un gran cantidad di participantenan den e comunidad.
