Den sistema electoral di Aruba No ta existi Minister Independiente manera cu Marisol Lopez Tromp ta pretende

ORANJESTAD,Aruba

Den forma bon cla partido POR a tuma e decision di pidi Minister di Infrastructura, drs Marisol Lopez Tromp, pa su retiro como Minister den representacion di e partido den gabinete Wever Croes y tambe como miembro di e partido blauw.

A pone un fecha limite pa Marisol retira como Minister pero e no a haci esaki y analisando contenido di e carta cu partido POR a dirigi na su persona, ta mustra bon cla cu e no tin confiansa mas di e partido.
Pues manera a bira bon cla tambe, Minister Marisol a dicidi cu e no ta retira for di e pueto, cual e tabata ocupando den representacion di partido POR, cu ta e partido cu tin dos asiento den Parlamento y cu tin acuerdo di gobernacion cu partido MEP y partido RED.

Marisol Lopez Tromp pues ta practicamente actuando como un Minister Independiente, algo cu ta mas bien conoci y posibel den Parlamento, caminda un miembro di un fraccion por dicidi di bida independiente y reglanan ta permiti cu e por keda cu e asiento di e partido na cual e tabata pertenece.
Minister Marisol no ta representa na e momentonana ki ningun partido politico den e actual coalicion y practicamente por bisa cu el a inventa e titulo di Minister Independiente y cual tampoco ta cuadra cu reglanan di bon gobernacion y por ta demostra loke ta nificacion di e palabra integro cu tanto e propio Mariol sa papia di dje na varios ocasion.

Partido MEP  y RED tin un acuerdo di gobernacion cu partido POR y ningun momento tin un acuerdo di gobernacion firma pa e persona di Marisol Lopez Tromp cu  ta mustra cu e ta ocupando un responsabilidad cu e no tin derecho di ocupa na e momentonan aki.
E tres partidonan cu ta formando e coalicion actual, como partidonan a apunta nan Ministernan ya c’un Minister no ta wordo elegi durante e proceso electoral y ta lanta e pregunta, di con Prome Minister Evelyn Wever Croes no ta actua contra di e situacion aki, apesar cu e mes ta bisa cu ta asunto interno di partido POR.

Prome Minister Evelyn for di prome dia ta papia di integridad den gobernacion pero te ainda no a dicidi di kita e poder di firma decisionnan cu ta mara su gobierno dor di Minister Marisol Lopez Tromp, ya cu e minister aki no ta forma parti di e coalicion y di e programa di gobernacion cu a wordo firma entre e tres partidonana ki.
Den e coalicion MEP-POR-RED no ta existi partido Marisol Lopez Tromp y si ta insisti riba integridad den gobernacion di e pais, Minister Marisol lo mester a tene e honor na su mes y si esaki no ta e caso, e mester wordo manda cas pa e coalicion actual.

En realidad por bisa cu esaki ta un falta di respet total pa Constitucion di pais Aruba y sigur di un politico cu den ultimo añanan, a conoce un decandencia serio den confiansa di pueblo pa cu su persona.

For di un politico grandi den partido MEP cu cerca di cinco mil voto, Marisol a bay pa AVP caminda el a cay casi 50% den su total di voto personal y awor cu el a bay forma parti di partido POR, su caida den popularidad tabata asina mas serio y grandi, ora cu e no a logra di yega den cercania di mil voto.
Esaki ta mustra cla cu Marisol no ta gosa di confiansa di e pueblo votado, ya cu si e tabata un politico cu sosten grandi, caminda e mes a logra si saca su mes cu votonan personal, ta otro cos pero en realidad na e momentonan aki, Minister Marisol Lopes Tromp a crea pa prome bes den historia politico di pais Aruba, e posicion di Minister Independiente.

Pa colmo ta tristo cu e ta wordo permiti pa sigui atende un posicion cu e no tin derecho di atende den nomber di pueblo, ya cu realmente Marisol no ta representando ningun partido politico na e momentonan aki, riba cual pueblo a duna su voto den ultimo proceso electoral.

Como persona integro, persona cu semper a papia di respet na reglanan existente, Marisol na e momentonan aki ta mustrando cu e mes no ta cumpliendo of miho bisa, no kier cumpli cu reglanan sagrado di loke ta integridad den gobernacion di e pais.