No ta for di awo pero algun simannan atras a avisa cu sargassum a cuminsa yega na costa di Aruba specificamente na Grape field . Sinembargo no ta solamente na Grape field e sargassum a penetra pero tambe na Natural Bridge pa Sharkbay y Andicuri, banda di cu tin un situacion di sargassum ainda ta haya varios saconan di sushi benta canto di awa, esaki ta inaceptabel y e situacion di sushi na Aruba ta birando alarmante.
Fundacion Turtugaruba ta lamenta e situacion aki mirando cu e ta birando un problema pa e bishitantenan di tur dia cu ta cana for di e Natural Bridge pa Sharkbay y Andicuri. E problema a keda raporta via FIXi.aw pero sin e resultado desea. City Inspector no ta poniendo atencion riba e kehonan cu FIXI.aw
Fundacion Turtugaruba a purba di kita e saconan, pero no tabata facil debi cu e saconan tabata kibra. Tambe a trata di limpia e beach pero e saconan tabata bira asina pisa cu nan tabata kibra y tabata imposibel pa por hisa nan pone nan ariba. Sinembargo Fundacion Turtugaruba a sortia e sushinan y a logra bay cu loke por a bay cu ne.
Tambe Fundacion Turtugaruba ta indica cu no mester haci e sargassum limpi mirando cu naturalesa mes lo haci esaki, pero lamentablemente Departamento di Naturaleza y Medio Ambiente( DNM) ta drumi y den nan propio iniciativa no ta moviendo un dede pa duna informacion y conscientisa comunidad di Aruba riba desaroyonan di sargassum. Mientras cu na Boneir, Corsou y St Maarten tambe e bahia nan a yena yen di sargassum pero a conscientisa comunidad riba e parti aki como nan tarea di Departamento di Naturaleza y Medio Ambiente( DNM).
Na mes momento Fundacion Turtugaruba ta haci un yamada na comunidad pa no laga bo saco di sushi atras riba ningun beach,No ta necesario pa kita sargassum, awa y palu di playa en general paso naturalesa mes ta haci su trabou, Si bo topa cu plastic riba un beach, por fabor haci bo parti como ciudadano di Aruba y yuda mantene e beachnan limpi.
