Na e komemorashon di Dia Internashonal Mundial di Pueblonan Indigino , 9 di ougùstùs, nos ta hasi un apelashon na komunidat internashonal pa para den solidaridat ku pueblo Nativo di Boneiru den nos lucha kontínuo pa hustisia, dignidat i sobreviviensa
Nos identidat, kultura i derechonan fundamental ta bao di amenaza direkto. E stâtus polítiko aktual di Boneiru ta kita I trapando nos protekshonan ku ta garantisá bou di ley internashonal pa teritorionan sin-propio-gobernashon. Nos ta hasi yamada urgente global pa sostene nos esfuezo pa pone Boneiru bèk riba e Lista di Teritorio No-Autónomo di Nashon Uni — un paso krusial pa protehá nos pueblo for di eliminashon polítiko i ekstinshon kultural.
Awe nos ta yama atenshon urgente riba e kontinou dominio I kontrol kolonial, negligensia sistemátiko, i e eliminashon kultural ku e pueblo Nativo di Boneiru ta sufri bou gobernashon direkto di Hulanda. E dia aki, basá riba e rekonosementu global di inhustisianan históriko i e prinsipionan di Deklarashon di Nashon Uni tokante Derecho di Pueblo Indígena (UNDRIP), ta eksigi pa haya rekonosementu di pueblo original di Boneiru — nan identidat kultural, soberania históritiko i derechonan natural I legitimo riba nos propio tera. Papiamento, nos idioma nativo i un pilar vital di nos kultura, ta wordu intenshonalmente margina den sistema di edukashon pa aselera e eleminashon di identidat Nativo.
E populashon Nativo di Boneiru ta enfrentando un situashon gravisimo i ku ta empeorando rapido: den pasado, promé ku 2010, nos tabata mas ku 80% di e populashon, awor aki nos a bira un minoria margina di ménos ku 30% den nos mes isla ansestral. E kambionan demográfiko alarmante aki no ta reflehá solamente eksklushon i desplazashon, pero un desmantelamentu kalkulá di nos eksistensia komo pueblo.
E momentu aki ta un chens poderoso pa amplifiká nos demandanan pa deskolonisashon, autodeterminashon i supervishon internashonal, mientras ku nos ta halsa nos bos pa pueblo di Boneiru — en buska di dignidat, rekonosementu i hustisia riba nos propio tera ansestral.
Nos ta hasi un yamada na komunidat internashonal, defensornan di derecho humano i siudadanonan global:
Halsa bo bos. Sostene Boneiru. Yuda nos restora e kaminda pa autodeterminashon i protehá nos herensia Indígena pa generashonnan ku ta bin.
