Aña 2023 no a habri drechi mes cu ya Mike Eman y AVP a manda poco di su politiconan nobato pa ataca MEP y e coalicion actual. Asina nan a manda tambe e specialista Selene Kock kende a trece poco ponencia padilanti sin pia sin cabez. Entre otro el a mustra su preocupacion pa cu un supuesto deterioro di nos cuido medico, lubidando di splica pueblo con su partido AVP a laga renoba y amplia e lugar caminda e ta traha, esta Horacio Oduber Hospital pa un suma di casi 1 biyon florin pa ser paga den 29 aña, siendo cu e suma inicial pa cu e renobacion y ampliacion di e hospital aki lo mester a costa total 653 miyon florin. Pues mas di 300 miyon florin extra na gasto di construccion cu nos tur tin cu bay paga ainda, anto cu e orguyo falso di Mike Eman.
Cost overrun Hospital di 300 miyon florin
E motibo principal di e cost overrun explosivo aki di mas di 300 miyon florin tabata cu na inicio di construccion e compinchinan di AVP a ‘lubida’ di inclui e cambernan di operacion den henter e construccion y varios otro sector importante di e hospital no a ser inclui. Y riba dje e expertonan compinchi di AVP riba kruk cu un gipsverbandmeester berde berde como lider di e proyecto a laga construi un generator mey mey di e hospital y caminda tur e patientnan y henter e personal di hospital incluyendo e specialista di pulmon Selene Kock mester a guli e gasnan venenoso tur dia. Selene Kock a lubida con varios departamento di e hospital mester a cera y varios operacion a ser cancela ya cu e gas venenoso tabata yega te den e cambernan di operacion? Ta kendenan tur nan pulmon a ser afecta pa e gas aki? Tur esaki ta cay bao di e Bon Comun cu tur dia AVP ta papia di dje?
Gastonan di cuido medico na 2017 y 2021
Ora cu Selene Kock ta mustra su preocupacion pa cu e situacion di cuido medico na Aruba, e kier crea e impresion den pueblo cu e gobierno di MEP a laga corta y reduci drasticamente e gastonan di cuido medico desde final di 2017. Pero cifranan concreto di AZV ta demostra cu na final di 2017 e zorgkosten total tabata 392 miyon florin y pa Opname y Verpleging so esaki tabata 169 miyon florin.
Y na 2021, esta bao di gobernacion di MEP e zorgkosten total tabata 447 miyon florin y pa Opname y Verpleging esaki tabata 179 miyon florin. Pues di unda Selene Kock a sali cu e ponencia cu e gobierno actual deliberdamente a corta den gastonan y crea un deterioro di nos cuido medico?
Finalmente lo ta bon pa dr. Selene Kock tin un tiki mas aprecio y reconocemento pa tur loke e gobierno actual a haci te cu awo pa mehora e cuido medico na Aruba, entre otro tur loke ta sosodiendo na IMSAN riba tereno di radiologia y cuido di wowo y caminda hopi patient no tin nodi bay den exterior mas pa haya tratamento medico y cu esaki ta scapa AZV y pais Aruba hopi placa. Y loke ta positivo tambe ta e recien firmamento di e acuerdo di cooperacion entre Hospital y IMSAN pa mehoracion di cuido medico na Aruba.
