Giants tin 17 landando yen di ambiente rumbo pa e 34th anual Speedo Winter Championships Plantation, Florida. Esaki ta di cuater aña cu Giants Aquatics, funda na aña 2020, ta participa. Pa participa na e campeonato aki, e atleta mester cualifica. Esaki ta un gran logro cu ta materialisa e vision di Giants Aquatics, cu ta encera, entre otro, prepara e atleta pa e competi riba nivel internacional, experiencia competencia riba nivel halto, haci su mes presente den bista di e coachnan cu ta scout y bin na remarca pa ricibi scholarship, cu cual e por studia, mientras e ta haci su deporte.
E landadonan cu lo participa na e competencia, cu lo tuma luga di 12 pa 15 di December, ta; Avi Tromp, Ruben Mansur, Ian Barkmeyer, Luis Mario Arends, Tristan Niebles Diaz, Sarah y Gideon Flanegien, Bobby Gibson, Noemie y Elise Erasmus, Wolf Massez, Javen Odor, Neymar Rasmijn, Alyssa Ras, Czyaleah Lampe, Zoey Engelhardt y Inald Fernandes Perna. Nan lo ta bou guia di e coachnan Rayon Lampe, Vera Barkmeyer y head coach Jordy Groters.
E atletanan a prepara nan mes intensivamente y cu sosten incondicional di nan mayornan, nan ta cla pa sali bay. Board di Giants Aquatics ta inmensamente agradecido pa e commitment cu e mayornan tin cu nan yiunan y cu Giants Aquatics Aruba.
Giants Aquatics Aruba ta sigui desaroya y materialisa su vision, treciendo innovacion den mundo di landamento na Aruba.
