Den e debate publico actual na Aruba, nos ta mira un tendencia recien unda cu gobernantenan ta lansa yamadanan nacional pa e pueblo”haci Aruba limpi.” E mensahe aki, envolvi den un capa atractivo di amor pa patria y bon cuidadania , ta parce inocente na prome bista. Sinembargo, analisando e situacion for di un perspectiva periodistico, legal y administrativo, e yamada aki ta revela un desviacion alarmante di eresponsabilidad constitucional y gubernamental.
E pregunta central cu cada ciudadano mester haci su mes ta un simpel pero poderoso: Acaso ta e pueblo su trabou pa tene Aruba limpi, ora cu e ciudadano ya caba ta paga belasting pa e servicionan aki wordo ehecuta profesionalmente?
E Arubiano ta Pagando pa un Servicio cu no ta yega of no a haya manera debe ser.
Den un Estado di derecho, e relacion entre ciudadano y gobierno ta basa riba un contract social cla. E ciudadano ta cumpli cu su deber fiscal pagando belasting, impuesto di tereno, y demas carga financiero na cambio, e gobierno tin e OBLIGACION legal y etico di proporciona infrastructura, siguridad, salud, y servicio publico eficiente, incluyendo e mantencion di limpieza di nos pais.
E Departamento di Obra Publico (DOW) y SERLIMAR su ekiponan di trabou tin e tareanan operacional asigna pa garantisa cu e isla ta keda limpi, ordena y manteni. E fondonan pa paga e personal aki, e ekipo y ehercicio di e trabou ta sali directamente di e saco di e ciudadano mes cu e gobierno ta maneha, awo e ta bon maneha ? E gobierno a percura pa e departamentonan aki ta optimal pa por duna e servicio cu e pueblo merece, of a horca e departamento? Si a horke Dicon realmente?
Ora un gobierno ta pidi e pueblo pa sali caya bay duna man den limpiesa general, esaki no ta un acto di bondad gubernamental; esaki ta evidencia di un fayo den maneho. E pregunta ta:
• Dicon DOW y of SERLIMAR no ta conta cu e ekiponan y hermentnan necesario?
• Ta unda e placa di belasting di e ciudadano ta bayendo?
• Acaso e ekiponan di trabou di DOW no ta wordo controla adecuadamente door di e manehantenan pa cumpli cu e tarea pa cual nan ta ricibi salario?
E Transferencia di Responsabilidad: Di Obligacion pa Caridad
Un gobierno cu no ta cumpli cu su departamentonan gubernamental, y consecuentemente no ta cumpli cu e pueblo, ta opta pa un strategia di “shift of blame” (shiftamento di culpa) y manipulacion emocional.
Ora e infrastructura estatal ta fracasa debi na mal maneho of negligencia presupuestario, e gobernantenan ta uza e carisma di “bondad” pa pone e pueblo mes soluciona e problemanan cu e propio gobierno ta obliga pa resolve.
Ora un ciudadano ta obliga bou di presion social pa haci e trabou cu e ta paga e gobierno caba pa haci, ta sosodiendo loke nos por yama un doble cobransa moral y financiero: e ciudadano ta paga belasting pa e servicio, y despues e mester inverti su propio tempo fisico y energia pa e ehecucion di e tarea ey. Esaki ta kita e responsabilidad for di e politico y ta pon’e riba e homber di e ciudadano comun.
Conclucion Periodistico
E yamada nacional pa “haci Aruba limpi” ta un distraccion di e berdadero malesa administrativo cu ta azotando nos isla. Amor pa Aruba ta indiscutibel; cada un di nos ta stima nos tera. Pero amor pa nos isla no por nifica aceptacion di negligencia gubernamental y incompetencia administrativo.
Un pais no ta wordo guia dor di uza e pueblo como man di obra gratis pa tapa buraco di mal maneho. E solucion no ta pa e ciudadano baha bay limpia caya, sino pa gobierno cumpli cu su obligacionnan y debernan legal, duna DOW y SERLIMAR e budget y hermentnan necesario, y haci e controlnan estricto pa e placa di belasting di e pueblo traha pa loke e ta destinado. Ta ora pa exigi responsabilidad real, enbes di permiti cu sentimentalismo ta tapa mal gobernacion y previlegionan pa compania priva siendo cu pueblo mes tin su dos companianan estatal cu e gobierno mes no ta hincando placa den dje.