Minister Plenipotenciario Guillfred Besaril recientemente a ricibi bishita di e embahadora di India na Hulanda sra. Reenat Sandhu. Tambe presente na e bishita aki ta Representante di Aruba na Union Europeo mr. Juan Ady Thijsen.
Embahadora Sandhu a bishita e representante di Aruba na Hulanda pasobra su persona tambe ta representante di India pa Reino Hulandes den su totalidad.
Durante di e bishita a papia riba e tema di medicina generico pa cual India ta reconoci pe. Tambe a bai den extenso riba e tema educacion unda a menciona cu Aruba tin dos pa tres Universidad, di cual Xavier University School of Medicine ta uno di nan cu ta mas grandi y conoci, pero tin otro dos tambe cu ta duna pre-med. Aruba tin un comunidad di decendiente di India hopi grandi y cu hopi di nan ta bin haci e estudionan aki pa asina nan por drenta den Universidad na Merca. A papia pa expande e facultadnan na e Universidadnan aki den e ramo di computacion y technologia, pasobra India ta hopi leu den loke ta innovacion. ‘Mas di iniciativanan asina bin Aruba ta mas mihor pa nos comunidad, nos hubentud cu tambe via di e Universidadnan aki por haci uso di conocemento di India. Nos a papia tambe di un manera pa yega na mas cooperacion entre e Camara di Comercio di Aruba y di India pa explora kico ta e posibilidadnan y nesesidadnan di tanto India como di Aruba,’ asina Minister Besaril a bisa.
Por ultimo Minister Besaril a bisa cu a papia riba e lasonan cu e comunidad di India na Aruba y e sosten cu embahadora Sandhu a pidi Aruba, como un di e paisnan den Reino, pa na momento cu India haci e cambio di e trabaonan consular di Venezuela pa Panama cu Aruba lo sostenen nan ora cu esaki keda presenta na nivel di Reino Hulandes.