Entidat Públiko Boneiru i Bonaire’s Innovation & Technology Lab (BIT-Lab) a firma un akuerdo di kolaborashon. E meta ta pa enbolbí hóbennan na nos isla i bonerianonan den eksterior mas ku futuro di Boneiru.
Grupo di eksperto di hóben i regreso di profeshonalnan hóben
E proyekto ta enfoká riba tres punto importante: lanta un grupo di eksperto konsistiendo di hóbennan, stimulashon di regreso di profeshonalnan hóben, i interkambio di konosementu i eksperensia entre nos isla i diáspora boneriano. E akuerdo ta konta pa un aña. Despues di un evaluashon por prolongá esaki.
Clark Abraham: “Diáspora ta un vínkulo indispensabel”
Diputado Clark Abraham ta mira e kolaborashon komo un paso importante: ‘Nos diáspora ta un vínkulo indispensabel den Boneiru su desaroyo. Ku e proyekto akí nos ke enbolbí hóbennan i profeshonalnan ku ta biba otro kaminda aktivamente ku futuro di nos isla. Ta importante pa nan sinti nan mes konektá i pa nan por hasi uso di nan konosementu i nan energia pa hiba Boneiru dilanti.”
Anthony Janga: “Nos ta konstruí un brùg”
Anthony Janga, presidente di BIT-Lab, tambe ta entusiasmá: ‘Ku e kolaborashon akí nos ta konstruí un brùg entre bonerianonan hóben, akí i den eksterior. Nos no ke solamente duna nan un bos, pero nos ke ofresé nan perspektiva tambe pa nan mes asumí un ròl den e temanan sosial i ekonómiko ku ta regardá Boneiru.’
Investigashon, temanan aktual i enkuentro
E proyekto ta haña sosten finansiero di Entidat Públiko Boneiru. BIT-Lab entre otro ta bai hasi investigashon, analisá temanan aktual i organisá enkuentro. Di e manera akí aktivamente nan ke konektá hóbennan i oumentá nan partisipashon.
Mas informashon
Bo ke sa mas? E ora ei manda un email na: info@bit-lab.nl