Awe Entidat Públiko Boneiru i Selibon NV a firma un akuerdo di ehekushon, den kua nan ta stipulá vários palabrashon tokante un pakete di medida di emergensia ku ta nesesario pa mehorá i stabilisá maneho di sushi na Boneiru. Ku e akuerdo akí nan ta pone pasonan konkreto pa logra un ambiente di biba mas seif i mas limpi pa hende, naturalesa i bestia. ‘Huntu nos ta salbaguardiá kontinuidat di servisio, nos ta redusí e riesgonan na e lèntfel na Lagun te na momentu ku e sera, i nos ta fortifiká e operashon empresarial di Selibon na un manera struktural,’ segun diputado Clark Abraham.
Pa aña 2025, Entidat Públiko Boneiru tin un suma total di USD 3,8 mion disponibel pa atendé ku e problemanan di mas urgente. Den e akuerdo di ehekushon akí e partidonan ta stipulá pa kiko ta destiná e medionan akí. Ta bai ehekutá un ouditoria eksterno independiente pa loke ta trata e eksigensianan finansiero i organisatorio pa un operashon empresarial salú di Selibon. E resultadonan di esaki ta forma e base pa un stipulashon di tarifa i futuro eskohonan di maneho ku lo keda formulá den un akuerdo di servisio nobo.
E partidonan ta stipulá ku Selibon i Entidat Públiko Boneiru ta trahando pa yega na un sistema kaminda e tarifanan ta kubri e gastunan. Pa logra esaki Entidat Públiko Boneiru lo adaptá e Ordenansa di Produktonan Residual (Afvalstoffenverordening) i e maneho entrante aña 2027. Banda di esaki Entidat Públiko Boneiru ta preparando un akuerdo di servisio nobo ku Selibon, entrante 1 di yanüari 2026. Diputado Abraham ta enfatisá: ‘Ku e akuerdo akí nos ta pone un paso importante den direkshon di un maneho di shushi responsabel i resiliente pa futuro na Boneiru. E problemanan ta grandi, pero pa medio di palabrashonnan klarito, stabilisashon finansiero i kolaborashon intensivo, nos ta krea e base pa hasi e kompania públiko importante akí salú i konfiabel atrobe na interes di siudadanonan di Boneiru i na interes di nos naturalesa.’
Tin atenshon spesial pa e empleadonan di Selibon. Ta bai mehorá e CAO, ta bin un programa di kapasitashon i desaroyo i ta bin un investigashon médiko pa e empleadonan, ku enfoke èkstra riba e empleadonan ku ta traha na e sitionan di depositá sushi. Banda di esaki, na aña 2025 Entidat Públiko Boneiru ta pone un prima di apresio disponibel pa tur empleado. Ta enbolbí e hendenan ku ta biba den bisindario di Lagun i Fundashon Pro Lagun tambe aktivamente via e konsulta periódiko, di manera ku transparensia i enbolbimentu di e bisindario ta keda salbaguardiá.
E direktor di Selibon Edsel Winklaar ta añadí: ‘Ku e sosten akí nos por mehorá nos servisio, fasilitá nos empleadonan mihó i kontinuá ku e modernisashon nesesario di nos organisashon. Esaki ta un paso importante pa nos empleadonan i pa nos komunidat.’
