Cuerpo Policial Aruba (KPA) conhuntamente cu Ministerio Publico (OM) ta anuncia e inicio di un accion nacional pa entrega arma di candela ilegal. E accion aki ta un iniciativa interinsular cu ta involucra e cuerponan policial di Caribe Hulandes, den cooperacion cu e Colegio di Hefenan di Cuerpo (College van Korpschefs). Esaki ta un colaboracion entre e organisacionnan di Caribe Hulandes cu sosten di e Ministerionan Publico di Aruba, Corsou, Boneiro, Saba, Sint Eustatius y Sint Maarten.
KPA y Ministerio Publico kier enfatisa cu uzo di arma di candela ilegal ta hiba na incidentenan serio y ta crea un sentimento di inseguridad den comunidad. Posesion ilegal di arma ta hiba na mas violencia. Segun ley, si bo wordo haya cu un arma ilegal den bo posesion, bo lo wordo deteni y sentencia door di un huez; tin persona cu ta haya varios aña di prison djis pa posesion di arma.
Sinembargo, tin biaha un persona cu tin un arma ilegal no kier esaki mas, pero tin miedo di entregu’e na polis pa no wordo deteni of pa no mester identifica su mes. Pa e motibo aki ta lansa e accion aki:
- Periodo: Desde 24 di maart 2026 te cu 24 di april 2026.
- Ubicacion (Pariba di Brug): Por uza e container blauw situa banda di warda di polis di San Nicolas.
- Ubicacion (Pabao di Brug): Lo anuncia e luga den e proximo dianan.
- Amnistia: Personanan cu entrega un arma ilegal den e periodo aki NO lo wordo persigui penalmente y ta keda anonimo.
- Municion: Esaki ta conta tambe pa bala y piezanan di arma di candela.
Nota importante: Despues di e periodo aki, si bo wordo haya cu un arma ilegal, bo lo wordo persigui penalmente cu tur su consecuencianan. KPA ta pidi pa entrega e armanan of piezanan debidamente paketa pa evita cualkier accidente.
