Local

Evento di KvK pa comerciante tabata bon bishita: Kvk A Tene Evento Business Plaza – Step Forward! Pa E Comerciantenan


ORANJESTAD,Aruba

Diasabra 18 di januari ultimo Camara di Comercio y Industria (KvK) a organisa su di 8 edicion di e evento Business Plaza – Step Forward! Un evento hopi exitoso caminda un biaha mas KvK ta trece informacion cu ta al caso pa publico y comunidad comercial. Durante Business Plaza – Step Forward! a ofrece diferente presentacion y tambe a brinda e oportunidad pa haya informacion y conseho gratis encuanto establece y expande bo negoshi. Cu un sala yen por mira cu e interes di e comunidad comercial ta significante y esaki ta motiva KvK pa sigui cu e bon trabou.

Business Plaza – Step Forward! Ta un evento gratis organisa door di KvK pa asina por brinda informacion y guia na e empresario cu ta desea di expande su liña di producto of servicionan y cu talbes kier restructura su negoshi of tin intencion pa expande cu mercado internacional. 

E programa a cuminsa cu un discurso di Vice-Presidente di Directiva di KvK, sr. Omar Tromp cu a yama e publico un cordial bonbini na Business Plaza – Step Forward! 

Siguientemente a sigui un panel di oradornan cu a contribui na e programa. SVb a duna un presentacion di MiSVb 2.0. Universidad di Aruba a trece informacion encuanto Programanan Educacional pa Empresarionan. Sra. Lindy Croes a conta encuanto con su negoshi a crece y a trece algun tips. Exprodesk a informa riba e posibilidadnan pa cu exporta productonan di Aruba. 

Despues di un pauze cortico a sigui cu presentacion di DTI encuanto permisonan pa negoshi y condicionan laboral. Departamento di Aduana a conta mas riba proceduranan di import y export. Y pa clausura e presentacionnan Departamento di Impuesto a duna un presentacion di nan sistema nobo cu ta facilita e proceso, baha e fluho na balie y elimina administracion di papel.

Durante e pauze hopi a haci uzo di e oportunidad pa busca informacion cerca instancianan invita presente cu nan booth. Departamento di Asunto Economico, Exprodesk, Universidad di Aruba y Qredits tabata esnan hunto cu e conseheronan di KvK cu tabata disponibel pa duna informacion na e publico presente.

E siguiente evento Business Plaza lo tuma luga na juni 2020 caminda KvK lo organisa Business Plaza-Get Started! dirigi na e persona cu kier cuminsa un negoshi. Sigui KvK via Facebook of www.arubachamber.com pa pronto haya mas informacion tocante e evento aki! Pa mas informacion tocante edicionnan di Business Plaza y otro eventonan di KvK, por tuma contacto cu Business Information & Support na 582-1566 ext. 27/35/42/30 of manda un e-mail pa: businessinfo@arubachamber.com.
Aruba, 20 di januari 2020

Camara di Comercio y Industria (KvK)


Related posts

Pronto lo inicia cu desaroyo di proyecto di vivienda innovativo pa cumpli cu demanda pa cas

EA News Author

IPA ta tene un anochi di informacion di e estudio pa maestro di Enseñansa Primario

EA News Author

Education USA Aruba ta celebra nan prome aniversario

EA News Author

Leave a Comment