Curacao Internacional

Gabinete Pisas ta keda para firme tras di e trayekto di bakunashon


Últimamente tin diskushon ta lanta kabes tokante e valides pa wòrdu bakuná. No opstante ku tin alrededor di 90 mil persona ku ya a risibí dos prek i ta full bakuná i ku pronto nos lo yega e kantidat di 100 mil, ainda tin un grupito ku ta propaganda pa no bai bakuná. Un akto lamentabel, paso ta sientifikamente probá i ampliamente konosí ku e bakuna kontra e vírùs di Covid 19, ta prevení enfermedat grave. 

Enfermedat grave kasi semper ta rekerí atmishon den nos hospital CMC i komo konsekuensia por hasta resultá den morto di esun kontaminá. Na momentu ku nos hospital yena, esaki lo buta e kontinuidat di kuido den e instituto na peliger pa falta di personal i falta di likides. Na momentu ku esaki sosodé, Gobièrnu di Kòrsou lo por hañ’é den e posishon ku mester bai tuma mas medida restriktivo. Mas medida restriktivo lo sigui afektá nos ekonomia den un forma negativo. Sigur awor ku pais ta pasando den un krísis ekonómiko hamas bisto.    

Bo salú i esun di otro nan ta importante. Ta p’esei Gobièrnu di Kòrsou ta sigui hasi su máksimo esfuerso pa keda konsientisá pueblo di Kòrsou riba e importansia di bakunashon i ta siguí rekomendá pa tur hende ku ta bini na remarke pa risibí e bakuna, bai bakuná. Semper i kuando despues di konsultá ku bo dòkter di kas pa evaluá si bo persona ta bini na remarke pa risibí e bakuna kontra e vírus di Covid.

E bakuná kontra dje vírùs di Covid 19 ku nos ta aplikando na Kòrsou, esta esun di Pfizer i Moderna, a wòrdu desaroyá i rekomendá riba nivel mundial dor di komunidat sientífiko. Pues ta un bakuna relativamente seif pa wòrdu usa i ku relativamente tiki efekto sekundario. 

Un persona ku a wòrdu full bakuná, semper ta keda ku e chèns ku e por wòrdu kontaminá dor dje vírùs, aunke ku ménos probabilidat. Pero te kaminda ku un persona full bakuná wòrdu infektá mes, e chèns p’e vírùs desaroyá su mes den un forma agresivo den su kurpa i kousa daño, ta limitá i esaki den mayoria kaso por prevení enfermedat grave. 

Banda di ku e bakuna kontra Covid 19 por prevení enfermedat grave i tambe den sierto kaso por hasta duna un protekshon èkstra i prevení esun full bakuná di wòrdu kontaminá, ta eksistí estudio sientífiko ku ta mustra ku te hasta den kaso ku un persona full bakuná wòrdu kontaminá, e chèns ku e vírùs wòrdu plamá dor di e mesun persona aki ta limitá. Pues tur ta benefisio nan sumamente positivo i importante p’esnan full bakuná. Ta p’e motibu aki organisashonnan prestigioso manera European Medicines Agency ( EMA ) na Oropa i U.S. Food and Drug Administration ( FDA ) na Merka a ofisialmente aprobá uso dje tipo di bakuná ku nos ta usando na Kòrsou. Un bakuná ku por wòrdu usa den un forma seif pa personanan fo’i dje edat di 12. 

Resien gobièrnu a introdusí e prueba di bakunáshon digital ( Curaçao Health App ). Na momentu ku e suidadano wòrdu deklará komo full bakuná, ta eksistí e posibilidat p’e suidadano por laga traha un QR-code atraves dje website di Gobièrnu. Tur suidadano tin e posibilidat pa risibí un QR-code ku por wòrdu usa lokalmente i pa biaha dentro di Reino Hulandes i Oropa.  

Ban siguí kuida. Bai bakuná

Related posts

Partido Inovashon Nashonal a pone desaroyo di agrikultura, krio di bestia i peska haltu riba agenda polítiko

EA News Author

Wardakosta ta sigui busca riba Dos piscado di Aruba perdi riba laman

EA News Author

Di 5 blackout den corto tempo na Korsou

EA News Author

1 comment

Leave a Comment