Durante e tratamento di Presupuesto 2023 den Parlamento di Aruba, Minister Maduro di Finansa a splica cu Gabinete Wever-Croes ta mustra seriedad den gobernacion y ta logra reduci e deficit ocasiona pa e pandemia y ta yega atrobe na un surplus pa Aruba.
Surplus na aña 2019
Minister Maduro a trece dilanti cu na desde cu Gabinete Wever-Croes a yega na mando, trabou serio a wordo haci riba e tereno di finansa publico pa asina por a recupera e credibilidad financiero di Aruba. Cu Hulanda a yega na un Protocol na november 2018 y caba na fin di aña 2019 ta logra yega na un surplus chikito di 4 miyon florin. Un logro ya cu na e momento eynan ta despues di 12 aña un Gobierno di Aruba ta yega na un situacion di surplus pa Aruba.
E deficit produci pa e pandemia ta bira un surplus pa aña 2023
Pa aña 2020 Gabinete Wever-Croes a premira un surplus di 46 miyon florin, pero e pandemia di Covid-19 a presenta y cambia e panorama financiero pa un deficit di 1028 miyon florin. A traha duro y na un manera serio pa e añanan cu a sigui keda baha e deficit mas cu por. Aña 2020 a cera cu un deficit mas chikito, di 764 miyon florin. Den aña 2021 a reduci e deficit na 534 miyon. Na aña 2022 a presenta un deficit na prome instante di 148 miyon y awo cu Cambio di Presupuesto 2022, ta bay reduci e deficit aki te na 92 miyon florin. Pa aña 2023 Gabinete Wever-Croes a presenta un presupuesto cu un deficit di 25 miyon florin y awo ta logra pa cambia esaki pa un surplus di 63 miyon florin.
