Tur (èks-)trahadó di Isla un bes mas ta bai risibí pago di redundansia. Esaki Gobièrnu di Kòrsou resien a palabrá konhuntamente ku Refineria di Kòrsou (RdK). Ta trata aki di e di 5 i último transh ku lo bai paga e trahadónan, kual ta suma un montante total di ANG 12 mion.
E desishon a kai despues ku gerensia i konseho di supervishon di RdK, den konsulta ku akshonistanan, a bai di akuerdo ku e proposishon riba mesa. Intenshon ta – igual na tur transh anterior – pa RdK por rekuperá e montantenan ku ya a yega di paga i ku ta bai paga awor, dor di ‘claim’ nan serka PDVSA. Sinembargo, resultado positivo òf nò di esaki no ta di influensia riba e siguransia pa e (èks-)trahadónan risibí nan kompensashon.Na momentu di pago lo tene debida kuenta ku tur posibel palabrashonnan hasí ku sindikato.
Gobièrnu i refineria di kòrsou ta yega na akuerdo pa paga e di 5 transh na (èks-)trahadónan di isla
