hóbennan a presentá e obranan di arte ku nan a krea durante e proyekto Kibra i Konstruí: Un Biahe den mi Rais na Mangazina di Rei. Den e proyekto di arte i patrimonio akí, nan a eksplorá kon pasado di sklabitut te ainda tin influensia riba identidat, patronchinan familiar i salú mental. Pa medio di pintamentu, spoken word i pelíkulanan di stop-motion, nan a kompartí nan eksperensia, konosementu i storianan personal ku famia, amigu, organisashonnan envolví i otro bishitantenan.
Durante e proyekto e hóbennan a bai riba un biahe den nan antesedente kultural. Nan a siña mas tokante pasado di sklabitut i a eksplorá kon e pasado akí te ainda tin influensia riba nan identidat i salú mental.
Historia, reflekshon i arte E último lunanan e hóbennan a sigui un trayekto edukativo i kreativo, den kua historia, reflekshon personal i arte a bini huntu. Durante e tayernan, nan a haña mas konosementu di kon pasado di sklabitut awendia ainda por influensiá famianan, edukashon i forma kon hende ta anda ku emoshon i ku pidimentu di yudansa. Papiando ku otro tokante esaki, a krea espasio pa rekonosementu, komprenshon i desaroyo personal.
Kada tayer tabata konsistí di un lès di historia, un kombersashon konhunto tokante salú mental i arte. E hóbennan a traha ku un di e tres formanan di arte: pintamentu, spoken word òf pelíkula di stop-motion. Den un ambiente sigur, nan a papia tokante temanan manera identidat, patronchinan familiar, konekshon i kapasidat di rekuperashon (resiliensia).
Biahe di inspirashon pa Kòrsou Komo parti di e proyekto, e hóbennan a realisá tambe un biahe di inspirashon pa Kòrsou. Aya nan a bishita museonan, instansianan kultural i diferente lugá históriko. E biahe a brinda e hóbennan oportunidat pa eksperensiá patrimonio i historia na un otro manera i pa dialogá ku otro tokante esaki. E eksperensianan a yuda nan konektá e pasado ku nan propio bida. E konosementu i eksperensia di e tayernan a forma e base pa e obranan di arte ku a presentá durante e eksposishon.
Konekshon i fortifikashon Ku e eksposishon riba 20 di yüni e proyekto a yega un klousura festivo i signifikante. E hóbennan a haña espasio pa laga tende nan bos i kompartí nan obra ku komunidat boneriano.
Kibra i Konstruí: Un Biahe den mi Rais a brinda hóbennan un lugá pa enkuentro, rekonosementu i kresementu personal. E proyekto a stimulá kombersashonnan habrí tokante tópikonan ku evidentemente no tur ora ta fásil pa diskutí, manera trauma ku ta pasa di generashon pa generashon, identidat i salú mental. Konektando historia, kultura i arte ku otro, a duna e hóbennan hèrmèntnan pa komprondé nan propio eksperensianan mihó i hasi esakinan diskutibel. Reflehando huntu riba e pasado i kreando espasio pa storianan di presente, e proyekto a kontribuí na konekshon i kapasidat di rekuperashon den komunidat boneriano.
Kolaborashon Entidat Públiko Boneiru (OLB), sekshonnan SKAL (Sekshon di Kultura, Arte i Literatura) i GGD Bonaire / Salubridat Públiko, a ehekutá e proyekto akí huntu ku Mental Health Caribbean (MHC). Kibra i Konstruí: Un Biahe den mi Rais ta forma parti di e Agènda di akshon Pasado di Sklabitut Boneiru i ta kai den e programa Fortifikashon di interkambio di patrimonio i kultura karibense. Nos partnernan Biblioteka Públiko Boneiru, FuHiKuBo, Glenn Helberg, Studio Pineda, Marz World, Ovier Maduro i Mangazina di Rei tambe a yuda hasi e proyekto akí posibel.
