Featured Local Politica

Hues a bisa bon cla den sentencia Werksternan ta haci limpiesa y nan gasto ta cay bou di gastonan di operacion


Aña pasa tabatin un sentencia di Corte cu ta papia bon cla riba e tema di e werksternan. Minister Lampe a haya rason den su ponencianan.

SKOA y 90 werkster a cuminsa e caso cu e tempo ey a wordo trata den luna di april, 2020.

E caso tabata relaciona cu carta cu Minister Lampe a manda pa SKOA dia 19 di december. Den esai ta para cu e gastonan di limpiesa di edificio y lokaalnan no mester wordo hinca den e parti di subsidio di personal, entrante december 2020, pero den e post di exploitatiekosten. Na mesun momento a informa nan tambe cu e voorschot mensual cu ta pidi di gastonan di salario pa subsidio di personal no mester hinca esun di werksternan, pero den esun di exploitatiekosten.

SKOA a entrega obheccion contra esaki dia 8 di januari 2020 y e werksternan a haci esaki dia 30 di januari. Despues a dicidi di entrega un caso na Corte dia 11 di februari.

Hues ta bisa den e sentencia cu e carta di 19 di december, 2019, ta un decision tuma manera ley ta bisa. Nan ta splica cu den e carta di december ta papia di un practica malo di añanan largo cu ta bay drecha awo.

Corte a bisa cu werksternan no ta partido den e caso aki pasobra con cu sea, nan lo haya nan salario. Aki ta trata di un asunto administrativo di SKOA. P’esey nan demanda a wordo declara no admisibel.

Den ley di LvBO ta papia di dos tipo di gasto. Den titulo II articulo 54 ta bisa cu e gastonan di e scol ta: salarionan, gastonan di salario y toelage, uitkering y compensacionnan cu e cabesantenan, maestronan y otro personal, manera describi den articulo 31, tin derecho riba dje, e contribucion di pensioen y esnan di nan viuda(o)nan, y huerfanonan, como tambe e primanan legal.

Na di dos luga den e gastonan di operacion: gastonan di limpiesa di edificio y lokaalnan, como tambe di uzo di coriente, gas y awa.

SKOA a bisa den Corte cu e decision di Minister pa haci e cambio ta en pugna cu ley y principionan di bon gobernacion.

Nan a pidi pa pospone e decision aki, pa sigui paga e salario di personal di limpiesa manera el a bin ta sosode, te ora cu tin un decision tuma door di un instancia mas halto.

SKOA a bisa cu na aña 2015 Gobierno a cataloga personal di limpiesa como “demas personal” den articulo 26 di enseñansa preparatorio, articulo 31 di scol basico y articulo 38 di enseñansa avansa, pa e salario aki por cay bou di subsidio di salario.

Tur loke tin di haber cu salario, primanan di pensioen, social, toelage di yiu y otro primanan a wordo hinca den e post di salario, basa riba e cambio.

E suma cu ta haya pa mantencion ta basa riba e cantidad di studiante pa klas. E norma aki ta data di 2010 y ta encera material di limpiesa, verf y diferente otro cos mas.

SKOA a bisa cu nan ta kere cu no mester paga salario for di e post di gastonan di operacion (mantencion). E norma lo no ta alcansabel pa nan. Yacaba na januari y februari a haya menos cla, cu ta net e suma di salario di werksternan.

Minister di su banda a bisa e tempo ey cu SKOA no tin urgencia, pasobra den lunanan di januari y februari, 2020 a deposita e suma pa salario di werksternan. Y lo sigui paga esaki te ora cu cera e investigacion cu tin andando.

E unico desbentaha ta culpa di SKOA mes. Nan ta unico directiva cu ta pone e salarionan di werksternan bou di subsidio di salario enbes bou di exploitatiekosten.

Na 1998 Departamento di Enseñansa a informa cu cu lo cubri gasto di salario di werksternan, incluyendo e contribucion di doño di trabou pa primanan di AOV/AI/VW. Por mira aki cu e no ta gelijkgesteld cu ambtenaar. Pues, e posicion huridico di demas personal no ta valido pa e werksternan.

Corte a bisa den su sentencia cu Ministerio di Enseñansa no a pone un paro den pago di salario di e werksternan. Pues ni SKOA ni nan no a wordo perhudica.

Hues a bisa cu gastonan di limpiesa di edificio y lokaalnan di SKOA ta cay bou di exploitatiekosten. Werksternan ta encarga cu e limpiesa pa cual Hues ta kee cu nan salario mester cay bou di exploitatiekosten.

Esaki a pone e Hues conclui tambe cu e decision cu SKOA a bay den obheccion contra dje cu casi tur probabilidad lo keda wordo wanta asina den Bodemprocedure. P’esey a rechasa demanda di SKOA.

Related posts

Cuerpo Policial durante weekend a atende cu en total di 28 asistencia cu tawatin di haber cu campaña politico

EA News Author

Prome Minister Evelyn Wever-Croes: Gobierno y hulanda ainda ta na mesa pa delibera sosten di likedes pa e di 4 kwartaal

EA News Author

Dunador di trabao y trahadornan mester uni pa sali hunto for di e pandemia di COVID -19

EA News Author

Leave a Comment