Den e ultimo siman-nan Kiwanis Club of Palm Beach, pa medio di su cuentanan di social media, a bin ta anunciando cu Diasabra dia 7 di mei 2022 lo tuma lugar e sigiente edicion di e Kiwanis “Blast from the Past” Nostalgia Party. “Blast from the Past” Nostalgia Party ta un evento pa amantenan di musica di añanan 60, 70 y 80. E evento ta presenta musica bailable di e epocanan aki den un forma di musica en vivo cu bandanan popular, complementa pa un DJ. E actividad aki ta un iniciativa pa recauda fondo pa asina por aporta na nos communidad, especialmente na muchanan den necesidad.
E evento di fundraising aki lo tuma lugar Diasabra dia 7 di mei 2022 den e mahestuoso ballroom di Hilton Aruba Caribbean Resort & Casino y lo ta cuminzando for di 8’or di anochi y lo bai te cu 1’or di marduga. E ‘line-up’ di banda y DJ pa e anochi aki lo ta: Musical Times cu musica di decada 80, The Kiwanis Band cu musica di decadanan 60 y 70, Joyride cu musica di decada nan 60 y 70, anto entre tur e bandanan aki e famoso DJ Edson Tromp, conoci pa club Visage, lo deleita e invitadonan cu musica di disco y hard rock di decada 80. Finalmente Musical Times lo cera e anochi cu broche di oro cu musica bailable, entre otro merengue, salsa y carnaval (tumba y roadmarch) di tanto decada 70 y 80.
Caarchinan ta obtenibel cerca tur miembronan di Kiwanis Club of Palm Beach of por pasa libremente na ‘The Specialists’ den Cayena Mall na Tarabana. Tambe por haci peticion pa caarchi via e Facebook-page di Kiwanis Club of Palm Beach y un miembro di e club lo percura pa bo haña bo ticket(nan).
Sr. Rothmar Coenraad, e actual President di Kiwanis Club of Palm Beach a declara: “Blast from the Past’ lo ta e prome evento di FUNdraising despues cu medidadan di Pandemia a keda cancela. Pesei ta invita un y tur pa, un biaha mas, bin disfruta di un fiesta bailable den e estilo unico di Kiwanis Palm Beach. Mientras cu bo lo pasa un anochi den un ambiente ameno, na e mesun momento bo tin oportunidad di gana premionan fabuloso y lo bo ta aportando na nos communidad, specialmente awor den un temporado cu nessecidad ta keda halto.”
Kiwanis Club of Palm Beach Aruba kier tuma e oportunidad aki pa extende palabranan di gradicimento na e empresanan y personanan cu a haci un donacion pa doorprize of cu a aporta na un forma of otro. Danki na e sponsornan aki a logra di realisa e iniciativa aki, for di cual tur loke cu wordo recauda lo bai den back den comunidad, especialmente na proyectonan dedica na bienestar di nos muchanan.
Kiwanis Club of Palm Beach ta pertenece na e organizacion global Kiwanis International cu ta un instancia caritativa dedica na haci nos mundo mihor door di cambia un communidad pa medio di un mucha cada bez. Mas informacion por haya riba: www.facebook.com/kiwanispalmbeacharuba.
