Dutch Caribbean Nature Alliance (DCNA) ta kontentu di por anunsiá resultado di e Big Live Nature Quiz – Kids Edition 2025! E edishon aki a alkansá un kantidat di inskripshon mas haltu ku nunka. Skolnan di tur parti di Karibe Hulandes a inskribí pa e evento edukativo di konosementu di oséano di mas grandi den e region!
E tema di e kues ta kambia tur aña, i kada aña e ta enfoká riba un otro tópiko importante di konservashon di naturalesa na e seis islanan di Karibe Hulandes. E tema di e aña akí, ‘Habitatnan Marino’, a kubri tur e diferente habitatnan marino ku por haña na nos islanan i nan servisionan importante di ekosistema. For di nos liñanan di kosta te e oséano profundo, e alumnonan di skol básiko un biaha mas a mustra nan konosementu di naturalesa i nan pashon pa esaki.
Big Live Nature Quiz 2025
Mas ku 850 alumno di e seis islanan di Karibe Hulandes a partisipá na e di sinku edishon akí di e Big Live Nature Quiz. Por konsiderá e evento di kompartí informashon akí un éksito kresiente, ku tur aña ta trese mas skol básiko i mas amante hóben di naturalesa for di Aruba, Boneiru, Kòrsou, Saba, Sint Eustatius i Sint Maarten huntu pa tèst nan konosementu, siña i mientrastantu pasa prèt tambe!
E kampionnan
E tim ganadó di e aña akí ta ‘Eco Detectives Curacao’ for di Kòrsou riba American Preparatory School! Ku un konosementu impreshonante di ref di koral, kama di yerba di laman, lagun, bahia
i nan ròl importante komo kamber di parto, e tim ganadó akí a surpasá nan kompetidornan i nan a logra e promé lugá den e Big Live Nature Quiz 2025. Komo un rekompensa bon meresí pa nan prestashon ekselente, e tim ta bai gosa di un trep riba barku di bela ku snòrkelmentu huntu ku nan dosente, kaminda nan ta haña chèns pa eksplorá bida bou di laman rònt di nan isla i profundisá nan konosementu práktiko tokante habitatnan marino. Ta ora pa pone man na obra, òf mihó bisá: ora pa bisti dùikbrel!
Tin diferente bunita premio tambe pa e ganadó lokal di kada isla, komo rekonosementu pa nan pashon, nan konosementu i nan kompromiso ku e habitatnan marino. E ganadónan lokal ta:
● Aruba: Tortuga (St. Annaschool)
● Boneiru: Sea Lions (IKC Kristu Bon Wardador)
● Kòrsou: Eco Detectives Curacao (Curacao American Preparatory School)
● Saba: Intelligent girls (Sacred Heart School)
● Sint Eustatius: Blue Beads (Governor de Graaff School)
● Sint Maarten: The Science Children St. Maarten (Asha Stevens Hillside Christian School)
E timnan akí ku na un manera sobresaliente a destaká na konosementu i trabou den tim, kada unu lo keda premiá ku ‘rash guards’ (tishùrt protektivo) di Big Live Nature Quiz pa sigui inspirá nan amor pa oséano i su ekosistemanan.
Un danki grandi na tur hende
Na tur tim i dosente ku a partisipá, DCNA ta ekstendé un pabien di kurason pa nan entusiasmo, nan dedikashon i nan konosementu impreshonante di naturalesa! Nos ta spera di mira e kampionnan hóben di medio ambiente akí sigui krese i protehá e biodiversidat marino riku di Karibe Hulandes.
Dibertido i edukativo
E kues a brinda nos muchanan un oportunidat fantástiko pa na un manera dibertido i interaktivo sera konosí ku naturalesa. Ku preguntanan basá riba e revista BioNews Kids di DCNA, e partisipantenan a siña tokante e habitatnan marino diverso i e ròl importante ku nan ta hunga den nos ekosistemanan i na nos islanan. E revista ku ta disponibel den vários idioma, entre otro ingles, hulandes, papiamentu i papiamento, a yuda e muchanan prepará pa e evento i lo sigui sirbi komo un rekurso edukativo balioso.
Un esfuerso konhunto pa edukashon tokante konservashon di naturalesa Education
E Big Live Nature Quiz ta un berdadero esfuerso di tim, ku a bira realidat pa medio di kolaborashon di tur e seis islanan di Karibe Hulandes i e partnernan di konservashon di naturalesa di DCNA: Aruba Conservation Foundation, CARMABI, STINAPA, Saba Conservation Foundation, Sint Eustatius National Parks Foundation (STENAPA) i e Nature Foundation Sint Maarten. Ku sosten di skolnan lokal, Energia TV, i kontribushonnan finansiero di Nederlandse Postcode Loterij, e evento aki a alkansá e kantidat mas grandi di hóben te ku awor den henter e region.
