BonaireFeaturedInternacional

Konsehal Daisy Coffie ku súplika na Kolegio Ehekutivo: Tuma akshon inmediato pa mantené nos isla limpi, bunita i dushi!

3876Fe70 B83C 4505 Bbe8 68C7E0D46E02

Den un karta pa Kolegio Ehekutivo konsehal Daisy Coffie di Frakshon Coffie ta hala atenshon di e Kolegio aki riba un situashon indeseabel di shushedat na Boneiru. Daisy Coffie: ‘Hasiendo un rekorido riba nos isla, pero tambe siguiendo medionan sosial, mi por a tuma nota di situashonnan indeseabel di sushi na diferente parti i tambe aglomerashon di kadavernan di auto den diferente bario di nos isla. Mi no por imaginami ku Kolegio Ehekutivo no ta tuma nota di e tantísimo sushedat ku tin riba nos isla i ku mal komportashon di nos komunidat ta pone ku na diferente sitio ta kreando lèntfilnan. Tampoko mi por kere ku Kolegio Ehekutivo no ta tuma nota ku na diferente sitio den barionan habitá tin garashi ta operá i ku e sitionan aki tin aglomerashon di outo dañá pero tambe kadaver di outo ku ta stroba tráfiko.

 

Impakto negativo

Mas aleu Daisy Coffie den su karta ta mustra riba e nesesidat pa mantené e lei- i reglanan al respekto: ‘Akaso Kolegio Ehekutivo no ta konsiente ni ta realisá ku e situashonnan deskribí aki riba ta forma peliger tantu pa nos salubridat públiko, pero tambe pa nos tráfiko regular di vehíkulonan i di nos peatonnan? Mi ta spera ku Kolegio Ehekutivo sikiera ta konsiente sí ku e situashonnan indeseá aki tin un impakto sumamente negativo pa promoshon di nos isla turistikamente komo un isla limpi, bunita i dushi sin sushi! Na mi humilde opinión lei- i reglanan no solamente mester keda trahá, stipulá i implementá, pero nan mester ta kontinuamente bou di supervishon i mantenshon pa no tolerá violashon di nan.’

 

Pregunta na Kolegio Ehekutivo

A base di su ponensianan konsehal Daisy Coffie ta dirigí e siguiente preguntanan na Kolegio Ehekutivo komo esun responsabel pa e direktorado di Mantenshon i Supervishon: Kolegio Ehekutivo por informá Konseho Insular si ta eksistí lei- i reglanan di medio-ambiente òf otro lei- i reglanan ku tin komo meta aktua kontra e violashonnan aki riba menshoná i Kolegio Ehekutivo por menshoná e lei- i reglanan aki? Kolegio Ehekutivo por informá Konseho Insular ta dikon e direktorado enkargá ku supervishon, mantenshon i kumplimentu di e lei- i reglanan aki no ta aktua ku man duru kontra violadó di e lei- i reglanan? Akaso por ta pa motibu ku: ta falta lei- i reglanan spesífiko òf tin skarsedat di personal pa hasi e trabou òf tin falta di outoridat legal pa aktua (lisensia di Agente Ekstraordinario di Polis) òf ta falta di fondo e direktorado tin òf ta falta di kapasidat di maneho? Ki medida riba término korto Kolegio Ehekutivo ta bai tuma i ku visibelmente komunidat por mira nan resultado konkreto, esta ku Boneiru ta bira limpi i ta deshasi di e sitionan den e barionan kaminda ta aglomerá kadaver di auto?

 

Plan konkreto

Terminando su karta Daisy Coffie ta trese dilanti ku Konseho Insular ta deseá pa mira un plan ku fecha konkreto, ki dia ta kuminsá aktua i tambe un raportahe visual di e resultadonan. Otro problema frustrante ta e kresementu di rama kantu di kaminda-, rooi- i damnan. Den nos barionan habitá tin un situashon peligroso: muchanan tin ku kana riba kaminda pa bai skol pasobra no tin “kant’i kaminda” mas; rama a tapa tur! No por! Konseho Insular ke mira un plan, kompañá pa fondonan i esnan ku lo ta responsabel (kompanianan) ku lo keda enkargá i tambe un raportahe di e resultadonan konkreto di e akshon aki. Mi ta konta di risibí kontestanan oral, konsiso i al kaso den e próksimo reunión públiko di Konseho Insular.

 

3876Fe70 B83C 4505 Bbe8 68C7E0D46E02

Related posts

E ley ta canando su caminda den parlamento

EA News Author

Boneiro ta enfoca riba e turista cu tin aprecio pa Naturalesa, Cultura y Medio Ambiente

EA News Author

Entrante 15 di september 2023 lo ehecuta e Encuesta di Forsa Laboral 2023

EA News Author

Leave a Comment

Whatsapp Message