Evelyn Wever-Croes ta Exigi Respect pa Aruba su Historia Constitucional y excusa di Staatssecretaris Van der Burg Lider di MEP, Evelyn Wever-Croes, a manda un carta formal y firme pa Staatssecretaris di Relacionnan den Reino, Eric van der Burg, den cual e ta expresa e indignacion profundo di e comunidad Arubiano tras di declaracionnan publico recien tocante e posicion constitucional di Aruba. Wever-Croes ta exigi un disculpa publico pa loke e ta considera un falta di conocemento historico y un insulto na e lucha pa emancipacion di e isla.
E controversia a surgi despues di declaracionnan haci pa Van der Burg dia 26 di mei ultimo. Segun Wever-Croes, e palabranan di e mandatario Hulandes no solamente a causa sorpresa, sino tambe decepcion y dolor den e comunidad.
E mandatario Arubiano a recorda Van der Burg cu Aruba su Status Aparte, adkiri dia 1 di januari 1986, no tabata un “regalo” ni un “coreccion tecnico”, sino e resultado di decadanan di lucha politico y mobilisacion democratico pa autodeterminacion.
Falta di contexto historico y financiero
Un di e puntonan mas critico di e carta ta e rechaso na e intentonan di Hulanda pa
“balansa” (gelijk trekken) Aruba cu Corsou y Sint Maarten pa medio di e Rijkswet HOFA.
Wever-Croes a subraya cu e islanan bisiña a ricibi un saneamento di debe significante na
2010, algo cu Aruba nunca a ricibi. “Aruba a carga su desaroyo financiero
independientemente sin e restructuracion excepcional cu a wordo otorga na otro paisnan,”
e carta ta dicta.
Rechaso total na Rijkswet HOFA
E carta ta enfatisa cu no tin base social na Aruba pa e Rijkswet HOFA. Mas di dies mil
persona a firma un peticion contra e ley aki, y 13 sindicato hunto cu un gran parti di
Parlamento a declara nan mes abiertamente contra. Ademas, e Raad van Advies a constata
cu e ley aki ta bay contra e Statuut di Aruba. Segun e lider politico, Aruba ya tin
instrumentonan local di supervision cu ta funciona y a demostra di por pone e financia
publico na ordo.
Exigencia pa Rectificacion
Wever-Croes a conclui e carta cu dos peticion masha cla: prome, pa mustra respet pa e
trayectorionan historico y financiero distinto di e paisnan den Reino; y di dos, pa
Staatssecretaris Van der Burg pidi disculpa publico na e pueblo Arubiano pa e manera
“incorecto y ofensivo” den cual el a representa Aruba su historia constitucional.
“Aruba no ta pidi fabor, Aruba ta pidi respet. Respet pa su historia, su posicion y su pueblo,” e
lider di MEP a termina bisando.
Ta lamenta y un berguensa pa Staatsecretaris Eric Van der Burg tin un funcion pa atende cu e islanan , pero no tin e conocemento real di e posicion di e islanan cu cada un di nan ta diferente y tin nan propio status, nan ta Aruba, Corsou y St Maarten , nan no ta isla nan CAS y no ta “ Zuster eilanden “ Cada isla ta para riba nan pia cu nan propio status y identidad y Aruba tin su status aparte. E pregunta cardinal ta kier baha Aruba pone na nivel di Corsou y st Maarten , unda cu ta maneha nan finansas,pero dicon no ta halsa e islanan duna nan e mes un status cu Aruba tin ? pa nan mes atende cu nan asuntonan y maneha nan propio finansas?
