Kousa Promé a tuma nota di e konseho di voto di Fundashon Kòrsou Na Kaminda pa Libertat. Na promé lugá nos ta gradisí e fundashon ku e eskoho i desishon final. Nos ta apresiá e manera ophetivo ku a evaluá nos i e solidaridat i konfiansa ku e fundashon a demostrá ku su akshon. E kualifikashon ku Kousa Promé tin vishon, ta konsistente, serio, stret i profundo ta alegrá nos ya ku ta e balornan aki nos a traha i prepará p’e durante 10 aña.
Nos ophetivo pa drenta Staten di Kòrsou ta firme. Ku un posishon den Staten Kousa Promé lo sigui lucha pa solushoná e problemanan agudo di pueblo manera entre otro e pobresa ekstremo, kosto di bida haltu, un salubridat den krísis, barionan lubidá, un enseñansa ku ta sangrando i un retraso kultural grandi. Banda di tur e puntonan di akshon akí Kousa Promé komo Movementu Humanista lo sali firmemente na fabor di emansipashon di pueblo di Kòrsou mustrando riba su derechi legítimo di outodeterminashon. Nos lo sigui konsientisá e pueblo pa e realisá su balor, su potensial i su poder pa krese i bira un pueblo independiente firme pará riba su mes pia sin miedu di enfrentá mundu. Esaki lo bira un proseso emansipatorio ku lo dura algun aña di trabou duru. Dikon e trabou di un kolonia pa bira un pais independiente lo tuma su tempu? Pasobra na promé lugá e país kolonisadó den nos kaso Hulanda lo no pèrmití e kolonia lòs for di dje. Hulanda lo sòru pa mantené “Statuut” i pa semper nos sistema di ensenañsa keda unu hulandes. Ademas Hulanda lo hasi tur esfuerso pa keda tene Kòrsou mará na debe astronómiko serka dje.
Importante ta pa realisá ku konsientisashon no ta indoktrinashon ni manipulashon. Konsientisashon ta un proseso kaminda poko poko e pueblo ta siña p’e bira sabidó. Ta pa e motibu akí Movementu Kousa Promé a lanta i ta duna kurso i lès ya pa 11 aña ku su Akademia Popular Errol Scoop. Otro aspekto importante ta ku mester realisá ku e lucha di un pueblo pa e bira independiente no ta un eskoho di polítikonan pero di pueblo kompletu komo unidat. E polítiko ta guía e proseso aki huntu ku pueblo. Ta alkansá e statùs di independensia na momento ku e pueblo aseptá esaki i kuminsá lucha p’e. Ta e proseso serio aki Kousa Promé a logra start aki na Kòrsou ku un grado haltu di seriedat i konsistensia. E boluntat mester t’ei pa nos komo yunan di Kòrsou habri nos mente i ban sali dilanti pa un derechi sagrado ku nos tin komo pueblo i ku ta garantisá den leinan internashonal. Ta p’esei e proseso di dekolonisashon ta tuma su tempu. Nos ta konvensí ku pueblo di Kòrsou ta un pueblo sabidó ku lo brasa e lucha di emansipashon pa yega un dia na e yu di Kòrsou nobo den un Kòrsou nobo liber i firme pará den mundu.
E lucha pa un Kòrsou independiente ta sigui.
