Durante e reunionnan anual statutario di e Asosashon
Internashonal di Konsehonan Ekonómiko i Sosial i Institushonnan Similar (AICESIS), ku a tuma lugá dianan 5 i
6 di novèmber último na Shanghai, Repúblika Popular di China, Kòrsou a demostrá ku un pais chikí por tin un
papel grandi den koöperashon internashonal. Bou di liderazgo di Konseho Ekonómiko i Sosial (SER) di
Kòrsou, desishonnan importante a kai pa promové sostenibilidat, diálogo sosial i aliansa internashonal.
Un di e puntonan di diskushon prinsipal durante e kumbre tabata e presentashon di e índise di kresementu
sostenibel (abreviashon SGI na inglés). Esaki ta un hèrmènt inovativo, diseñá pa midí kresementu pa medio di
dimenshonnan sosial, kultural i medioambiental. E profesor húngaro, Dr. Gusztáv Báger, eksperto den
sostenibilidat, a presentá e SGI komo un alternativa pa e Produkto Interno Bruto (PIB) tradishonal. SGI a
mustra diferensianan grandi entre paisnan miembro: Hulanda i Irlanda a sobresalí den sostenibilidat i
inovashon, miéntras ku Gresia i otro ekonomianan emergente tin retraso den desaroyo. “Esaki ta un wake up
call,” segun señor Báger. “Nos mester re-imaginá loke nos ta yama progreso i pone hende i planeta sentral den
nos desishonnan.”
Delegadonan a suprayá e potensial di SGI, pero tambe nan a atvertí ku su implementashon por ta kompliká. “E
reto mas grandi ta eleminá e diskrepansia entre teoria i práktika,” segun un partisipante. Pa paisnan ku
limitashonnan di rekurso, manera Kòrsou, esaki por ta un situashon mas difísil. Sinembargo, e Presidensia di
Kòrsou ta señalá e retonan aki komo un oportunidat: “Paisnan chikí ta liderá regularmente ku kreatividat i
adaptabilidat. Nos mester sigurá ku e solushonnan akí ta risibí atenshon den foronan internashonal.”
Banda di aspektonan relashoná ku sostenibilidat, e kumbre a enfoká riba formanan di koöperashon mas
estrecho ku e Organisashon Internashonal di Trabou (OIT) i e Konseho Ekonómiko i Sosial di Nashonnan Uní
(ECOSOC). Na 2025, dos grupo di trabou di AICESIS lo kuminsá enfoká riba inklusividat i fortalesementu di
konfiansa entre aktornan global. “Diálogo sosial ta fundamental, pero delikado,” un representante di Zimbabwe
a komentá. “E ta dependé di konfiansa i di skucha otro, algu ku ta tuma tempu i esfuerso.” Akshonnan asina
aki ta forma un paso mas den e strategia di largu plaso di AICESIS pa kreá koöperashon entre paisnan.
Tambe e kumbre a pone énfasis riba un akuerdo renová ku OIT, ku lo ser formalisá na 2025. A kumbiní ku otro
aña Madrid lo sirbi komo anfitrion pa un konferensia konhunto di OIT-AICESIS, suprayando nan kompromiso
ku hustisia sosial global.
Un di e momentunan ku a resaltá mas durante di e kumbre tabata e anunsio ku Kòrsou lo organisá e próksimo
Asamblea General di AICESIS na novèmber 2025. E evento aki lo marka fin di e mandato di SER di Kòrsou
komo presidente di e asosiashon mundial, un periodo ku a karakterisá su mes pa un liderazgo fuerte den
ámbito internashonal. “Esaki nos no ta konsider’é komo un fin, sino komo un komienso nobo,” segun e
Presidensia di Kòrsou. “Nos ke mustrá kon un pais chikí por duna kontribushon vital pa enfrentá retonan
global.”
E reunionnan na Shanghai tambe a sirbi komo un plataforma pa forma aliansanan nobo. E Foro Tripartit
Nashonal di Zimbabwe a bira miembro ofisial di AICESIS, miéntras diskushonnan ku e Organisashon pa
Koöperashon i Desaroyo Ekonómiko (OECD) ta eksplorá futuro proyektonan. OECD a presentá su inisiativa
Global Deal, ku su enfoke ta riba restablesé relashonnan laboral ekitativo i promové kresementu inklusivo.
Pa e aña benidero AICESIS lo firma un Memorandum di Komprenshon (MoU) ku e Komité Ekonómiko i Sosial
di Union Europeo (EESC). E akuerdo aki ta pone un fundeshi sólido pa un koöperashon mas fuerte, ku lo
enfoká riba hustisia sosial i desaroyo sostenibel. Dimitris Dimitriadis, presidente di e departamento di
relashonnan eksterior di EESC, a klasifiká esaki komo “un paso esensial pa uni Europa ku resto di mundu via
AICESIS.”
Apesar di e logronan durante e kumbre, a bini na kla ku tin hopi trabou dilanti ainda pa desplegá. Den
debatenan, un pregunta a persistí: kon por realisá ku palabranan bunita i grandi realmente por trese
kambionan konkreto na nivel mundial? “Nos forsa ta den trese perspektivanan diverso,” e Presidensia di
Kòrsou a resumí. “Pero e reto real ta konvertí esakinan den akshonnan konkreto, i esaki ta responsabilidat di
kada miembro di AICESIS.”
Ku e próksimo Asamblea General na Kòrsou na horizonte, e isla karibeño ta mustrá ku inklusividat i liderato no ta dependé di tamaño, sino di vishon.
