Komo parti di e Memorandum of Understanding entre Boneiru i Royal Caribbean Group, e seri edukativo a ofresé studiantenan boneriano di MBO i VMBO e posibilidat pa haña un rekorido riba un barku di Royal Caribbean Group. Studiantenan di e formashon turístiko, pero tambe studiantenan di kuido di salú, beyesa, téknika i ingenieria mekániko (werktuigbouwkunde) a haña invitashon pa partisipá.
E seri edukativo a dura tres dia, kaminda diferente mènedjer di diferente departamento a duna presentashon i a ofresé e studiantenan un bista den nan trabou diario. Mas òf ménos 130 studiante i nan dosentenan a haña un oportunidat úniko pa siña for di profeshonalnan den e sektor.
E studiantenan no solamente a haña un rekorido eksklusivo riba e barku, pero nan a haña un chèns tambe pa papia ku vários mènedjer i hasi pregunta tokante nan respektivo departamentonan.
E seri tabata un éksito rotundo i e studiantenan a bandoná e barku ku un apresio nobo pa e tereno di labor akí i pa e trabou duru i dedikashon ku ta nesesario pa manehá un barku krusero.
Tur e presentenan a gosa di un lùnch i e fitbèk general di e studiantenan i dosentenan tabata impreshonantemente positivo.
Tourism Corporation Bonaire, Bonaire Port i Royal Caribbean Group ku hopi dedikashon ta hasi esfuerso pa invertí den turismo. E seri edukativo ta solamente un di e ehèmpelnan di e dedikashon akí i nos ta anhelá futuro posibilidatnan pa traha huntu.
