BonaireFeaturedInternacional

Lansamentu di Pueblo Progresivo Uni

James Finies

“Mi a disidí di drenta e arena polítiko lokal pa e motibu prinsipal di yuda sigurá i guia pa logra tur e benefisionan di e trabounan ku nos a hasi na nivel internashonal i di Nashonnan Uní”, esaki James Finies a bisa den un entrevista eksklusivo ku el a sostené ku nos.

Awor fundashon Nos Kier Boneiru Bèk (NKBB) a realisá su meta, despues di tur e trabou duru, e kaso di Boneiru ta na NASHONNAN UNÍ. E paisnan ku ta forma Nashonnan Uní ta trahando na e momento akí riba nos kaso pa nos por ta riba e lista di protekshon – e Lista di Teritorionan-Sin-Propio-Gobernashon di Nashonnan Uní.

“Awor mi ta kla pa tuma e siguiente paso: un komienso nobo di speransa i un mihó futuro pa nos pueblo di Boneiru. E momento di kambio a yega, e momento di kambio pa bienestar di Boneiru ta kuminsá awor”, señor Finies a sigui bisa.

Pa e motibu pakiko i kon tur kos a kuminsá pa James Finies, mester bai bèk algu mas ku un dékada pasá.

Despues ku a disolvé Antia Hulandes na 2010, a integrá Boneiru den Hulanda pa medio di abusu di poder, violando asina fundamento di henter sivilisashon moderno, leinan i tratadonan internashonal i di Nashonnan Uní. Un aneksashon ilegal, sin ku e pueblo di Boneiru a skohe. A nenga e pueblo su derecho fundamental pa disidí riba su futuro. Nos tur a keda di shòk ora Den Haag a kuminsá imponé su promé leinan: e leinan “inmoral”. No a buska drechi kua ta e nesesidatnan, e prioridatnan di e boneriano, a sali kumpli ku e deseo dje hulandes oropeo. Anto nos tur a realisá loke realmente a sosodé, tabata un baño di awa friu: nos a bolbe bèk na e dianan di kolonia; nos tur a realisá ku nos no tabata den un estado demokrátiko mas.

“P’esei mi ta akinan awe”, señor Finies a sigui splika, “pasobra mi a tuma mi tempu pa mas ku un aña, na 2011 i 2012, reuní ku tur nos lidernan polítiko i tambe lidernan di sektor privá – esnan ku realmente ta manehá nos polítikonan tras di kortina, finansiando i fomentando korupshon – ku nan tur mi a reuní.” Ora ku tur e lidernan di sektor priva i lidernan polítiko, bieu i nobo, a bisa ku e loke ku Boneiru ta aden, no ta loke nan a imaginá; no ta loke nan a spera; no ta loke nan kier, tampoko loke nan a negoshá, ni firma anto ku no por hasi nada mas, señor Finies a disidí di no aseptá sin mas. Señor Finies a disidí di no aseptá ku lo ignorá derechonan ku e i su yunan a nase ku ne, pasobra ami i nan ku ta nos generashonnan di futuro, a nase igual den dignidat i derechonan. Señor Finies a disidí di sigui su propio kaminda i buska un solushon pa su derechonan, derechonan di su yunan anto esei lo trese tambe tur otro derechonan dje boneriano.

“Mi a realisá ku nos tabata den un konspirashon, kaminda nada di loke nos tabata konsehá nos lidernan polítiko, sea tabata lei internashonal, e Karta Magno òf tratadonan di Nashonnan Uní, nos mes lidernan polítiko i e gobièrnu di Den Haag tabata neglishá òf violá.” Pa motibu ku el a sinti su mes menasá, señor Finies a skirbi un keho pa OHCHR, ku ta e Ofisina di Alto Komisionado di Derecho Humano, ku ta situá na Ginebra anto el a risibí un kontesta. Despues di esei, pa promé biaha, señor Finies a bai den publisidat, el a papia den notisia i programa di radio.

“Hopi hende no sa, pero mi a sobrebibí tres intento di asesinato, mi a keda detené inhustamente, pero nada di esei, ku tabata intenshoná pa eliminá mi òf spantá mi, no a logra stòp mi. A purba intimidá mi, asta uza mi famia pa stòp mi, pone ku mi a pèrdè mi trabou, mi poseshonnan, mi famia, pero tur loke ku nan a purba no a logra stòp mi.”

James Finies tin un trabou ‘full time’ luchando pa Boneiru komo boluntario. E ta tuma e paso di drenta arena polítiko lokal, un paso ku e ta konsiderá nesesario despues ku e kaso di Boneiru ta na Nashonnan Uní. Señor Finies ta sigurá ku e lo no laga e polítikonan ku a pone Boneiru den e situashon akí konfundí i daña tur e trabou duru. “Mi no ta drenta arena polítiko lokal pa nada personal, niun posishon, niun trabou, niun fabor, mi ta tuma e paso akí pa nos yunan, pa nos ñetunan. Esei ta loke mi a lucha p’e semper. Mi ta para awe riba lomba di mi antepasadonan i mi ta responsabel pa laga Boneiru atras, kaminda nos yu i nos ñetunan lo risibí rèspèt, kaminda lo respetá nan derechonan. P’esei mi ta tuma e paso akí.”

“Nos ta drenta arena polítiko lokal pa empoderá nos yu i nos ñetunan, pa rekordá nan ku nan ta e poder, ku nan no tin otro opshon sino pa uni pa defendé nos balornan, nos kultura, nos dignidat, nos derechonan i di nos yunan ku ta nos futuro.”

Finalisando James Finies a enfatisá: “Mi ta primintí i lo sigurá ku ami komo gobernante lo hasi solamente e trabou ku e pueblo asigná mi na dje pa e pueblo boneriano: respetá derechonan di nos pueblo; protehá derechonan di nos pueblo; kumpli ku derechonan di nos pueblo”

 

I am text block. Click edit button to change this text. Lorem ipsum dolor sit amet, consectetur adipiscing elit. Ut elit tellus, luctus nec ullamcorper mattis, pulvinar dapibus leo.

Related posts

Falta di klaridat pa maneho di laboratorio di Boneiru dor di Entidat Públiko

EA News Author

Tin 5 persona mas ku a test positivo cu COVID19 na Boneiro

EA News Author

Husto of Inhusto ?

EA News Author

Leave a Comment

Whatsapp Message