Parlamentario Dangui Oduber despues cu a Sali for di e reunion di Rijkswet ta sumamente desapunta cu e topico di Rijkswet cu ta asina importante ta wordo trata den un forma scondi. Segun parlamentario Dangui Oduber manera un ladron di anochi no kier comparti informacion importante pa e comunidad di Aruba sa kico ta pasando den e negociacionnan cu Hulanda riba Rijkswet.
Na momento cu ta trata e tema di Rijkswet nos ta papiando riba entrega di nos autonomia of nos lo lucha pa nos autonomia?. Pa por splica miho dicon ta papia di entrega di autonomia, ta paso Rijkswet ta un ley di Reino Hulandes cu ta wordo trata den Tweede Kamer na Hulanda caminda cu 150 miembro di Tweede Kamer na Hulanda lo vota na fabor of contra di un ley asina.
Parlamento di Aruba ta wordo”uitgeschakel” , parlamento di Aruba no tin ningun “zegenschap” mas paso parlamento di Aruba no ta vota na fabor of contra di e Rijkswet pero ta miembronan di Tweede Kamer.
Mirando esaki Parlamentario Dangui Oduber ta considera esaki como entrega di autonomia paso tur ley na Aruba ta wordo trata den nos sala di parlamento y cada parlamentario ta wordo scoge pa pueblo di Aruba pa representa pueblo di Aruba paso nos ta e voz di pueblo y na momento cu bay diacuerdo cu un Rijkswet ta kita e autoridad di e 21 miembronan di parlamento di Aruba y ta entrega e autoridad na Teedekamer na 150 miembro di parlamento na Hulanda.
Sinembargo loke cu ta cuestionabel na e momentonan aki ta cu e condicionnan a cambia. Tempo cu Aruba a wordo forsa pa haci prestamo durante di e pandemia Hulanda a opta pa obliga Aruba pa bay cu un Rijkswet.
Segun parlamentario Dangui Oduber na e momentonan aki Pais Aruba tin un surplus , Aruba ta cumpliendo cu tur e normanan den e “Landsverordening Aruba Financieel Toezicht “ , Aruba tin supervision financiero y tur e proyeccionnan cu tin ta , cu Pais Aruba ta bay mantene su surplus cu Aruba por cumpli cu nos obligacionnan y pa Aruba paga su debe.
Parlamentario Dangui Oduber ta lamenta e echo cu e gobierno actual di AVP-FUTURO tin e intencion di bay entrega Aruba su autonomia y bay diacuerdo cu un Rijkswet sin cu tin e necesidad di urgencia na e momentonan aki.
Segun Parlamentario Dangui Oduber nos ta cumpliendo, nos ta pagando y Aruba por keda paga. Pa un reduccion di interes di 5% pa 3% no ta kere ta husto pa e trato cu Aruba ta hayando for di Hulanda.
Sinembargo si mester mira na ruman isla Corsou y St Maarten cu tambe a haya un Rijkswet Financieel Toezicht a cambio di un “schuldsanering” a cambio di un” Kwijtschelding” Hulanda a paga nan debi di 4 y 5 biyon florin y acambio di esey nan a haya un Rijkswet Financieel Toezicht.
Sinembargo aki na Aruba Hulanda kier duna Aruba un reduccion di interes di 5.4% pa 3 % Hulanda no ta duna Aruba “schuldsanering” y na mes momento kier forsa Aruba pa bay den Rijkswet y asina kita e autonomia di Pais Aruba , kita e derecho di Aruba su autodeterminacion y kita e autoridad di miembro di parlamento pa vota na fabor of contra di e ley aki.
Parlamentario Dangui Oduber ta duna di conoce cu tempo cu e tabata minister e tempo ey Aruba tabata lomba pa muraya unda cu tabata un condicion di gobierno di Hulanda den e bestuurlijk akkoord cu a bay diacuerdo cu ne unda cu si Aruba no firma e bestuurlijk akkoord y bay diacuero pa acepta un Rijkswet Aruba no lo haya e prestamo y ningun hende na Aruba por a haya cuminda y of cobra nan salario, practicamente Aruba a crash.
Sinembargo loke ta un realidad Aruba tabatin mester di e prestamo ey pa tur hende na Aruba por a sobrevivi e pandemia cu tabata pasa na Aruba. Pero awe e situacionnan y condicionnan a cambia , economia a crece , turismo a bin bek, Pais Aruba su situacion economico a mehora , Aruba tin surplus y Aruba ta cumpliendo cu tur e normanan stipula den e presupuesto y Aruba tin supervision financiero y esaki ta pone cu awo Aruba no tin ningun necesidad mas pa acepta un Rijkswet cu ta kita e autonomia di Pais Aruba.