E delegashon di Tweede kamer
ku e siman aki tabata na Boneiru den kuadro di Reunion
Interparlamentario di Reino (IPKO), a hasi uzo di e oportunidat pa
pone nan mes na altura di e plannan di invershon di Water- en
Energiebedrijf Bonaire (WEB).
Pa motibu di e demanda kresiente pa koriente, mester ekspandé e
kapasidat di produkshon. Pa e motibu aki WEB kier hasi e invershon
nesesario pa hasi e manera di generá elektrisidat mas duradero. Mas uzo
di energia di bientu i solo lo kondusí na un bahada drástiko di e tarifa di
elektrisidat. E proposishon di WEB ta riba mesun liña ku e deseonan di
Tweede Kamer manera esakinan ta stipulá den diferente moshon.
Gerensia di WEB a keda risibí dor di e delegashon i e direktora finansiero di
WEB señora Joanne Balentien-Nicastia a duna splikashon di e plannan.
Esakinan a ser presentá na Ministerio di asuntunan ekonomiko i klima
(EZK), pero ainda no a tuma un desishon tokante e petishon pa supsidio.
Tempu ta kabando: si no tuma un desishon pa òktober, lo ta nesesario pa
pone generator di diesel adishonal, ku ta nifiká ku WEB lo sigui dependé di
petrolio karu i kontaminadó.
E presentashon a konta ku presensia di diputado señora Nina den Heyer.
Sra. Den Heyer a enfatisá ku bestuurscollege ta pará kompletamente tras
di e inisiativa di WEB. Miembro di gerensia di WEB Sra. Balentien-Nicastia
na final a hasi un petishon serka e delegashon pa para riba e kabinete pa
tuma un desishon positivo mas pronto posibel pa por garantisá seguridat di
suministro, redukshon di tarifa stap pa stap i hasi e proseso di produkshon
duradero.
Miembronan di parlamento ta haña informashon tokante plan di invershon di web boneiru
