Fuera di e falta di transparencia den destaho, Eduard Pieters a probecha e presencia di Minister Gerlien Croes den Parlamento pa cuestiona e falta di un Landsverordening Beroepsonderwijs (Ley di Enseñansa Profesional). Segun Pieters, ta “inaceptabel” cu den siglo 21, scolnan manera EPB y EPI ainda tin cu resorta bou di leynan bieu cu ta diseña pa mavo, havo y vwo.
“No por compara enseñansa general cu esun profesional. Enseñansa profesional tin su mesun dinamismo y mester di su propio maneho y legislacion separa,” Pieters a splica. El a enfatisa cu e ausencia di e ley aki ta stroba e capacidad di Inspeccion di Enseñansa pa eheri un control debido riba e calidad di educacion cu nos hobennan ta ricibi.
Den mas cu 1 anja di gobernacion ainda tin retraso legislativo
Un punto cu a hala atencion den e disertacion di e lider di PPA ta e tempo cu e proceso aki tin andando. Segun Pieters, e trabounan pa e ley aki a cuminsa for di aña 2018. Sinembargo, ocho aña despues, e concepto ainda no a alcansa e sala di Parlamento pa su debida debate y aprobacion.
Pieters a exigi un splicacion di parti di e Minister riba kico ta e motibo cu e proceso legal aki ta keda stanca. Pa PPA, e ley aki no ta simplemente un piba di papel, sino e base of e “randvoorwaarden” (condicionnan necesario) pa por garantisa un enseñansa di calidad na Aruba.
Oportunidadnan perdi pa debati
E lider di fraccion a lamenta tambe cu ta dificil pa haya Minister Croes den Parlamento pa rindi cuenta riba e topiconan aki. E bishita di e mandatario pa e tema di e destaho a wordo uza pa PPA como un oportunidad pa trece e precupacionnan aki dilanti, mirando cu, segun e parlamentario, e mandatario no ta duna cara frecuentemente pa contesta preguntanan crucial riba e calidad di nos sistema educativo.
“Si bo no tin e ley, bo no tin e instrumentonan pa controla calidad. Y sin calidad, nos ta hunga cu futuro di nos studiantenan di EPB y EPI,” Pieters a conclui.