Mientras na St Maarten nan ta informa y educa di e situacion di SIDA na Aruba tin un silencio rotundo di un realidad

Dia Mundial di SIDA: Vence disrupshon, transformá e respuesta kontra SIDA
E tema pa Dia Mundial di SIDA, cu lo ser observa globalmente awe 1 di desèmber 2025, ta “Vence disrupshon, transforma e respuesta contra SIDA,” segun Collective Prevention Service (CPS).
Dia Mundial di SIDA, cu ta celebra cada aña riba 1 di december, ta un iniciativa global importante pa uni hende den e lucha contra HIV/AIDS, mustra sosten pa esunnan cu ta biba cu e virus, y honra esnan cu a fayece pa motibo di malesa relaciona cu SIDA.
E dia ta un momento importante pa gobierno, organisacion di salud y comunidad pa renoba nan compromiso pa yega na e meta di UNAIDS: elimina SIDA como un menasa pa salud publico pa 2030.
Un di e principal obhetivo pa Dia Mundial di SIDA 2025 lo ta pa acelera esfuerso pa logra e meta ambicioso,95% di esnan cu ta biba cu HIV/AIDS mester sa nan estado, 95% di esnan cu tin HIV diagnostica mester haña terapia antiretroviral (ART) continua y 95% di esnan cu ta ricibi ART mester logra supresion .
CPS ta informa comunidad pa informa nan mes tocante e desaroyo mas reciente relaciona cu SIDA y HIV, esaki ta motibo pa inclui e topico aki den su kalender anual di observacion di salud.
Logra supresion viral ta esencial, pasobra esaki ta nifica cu e virus ta indetectabel, y no por transmiti sexualmente (indetectabel ta igual cu no-transmisibel).
E factor cientifico aki a cambia fundamentalmente e panorama social y medico di HIV/AIDS, permitiendo cu hende cu tin HIV por biba bida largo y salud, y preveni infeccion nobo.
Campaña di conscientisacion riba e dia mes lo pone hopi enfasis riba e importancia di haci test, cuminsa tratamento inmediato, y compronde cu ART moderno ta e instrumento di prevencion mas eficiente.
Finalmente, e conmemoracion ta sirbi como un recordacion fuerte riba e necesidad continua pa combati estigma y discriminacion. A pesar di grandi progreso medico, estigma social ta keda un obstruccion grandi cu ta preveni hopi hende pa busca test of sigui tratamento pa motibo di miedo pa hopi cos: husga, exclusion òf lealtad.
Dia Mundial di SIDA ta un yamada pa accion pa promove mas comprension y aceptacion den sociedad. Dor di stimula dialogo habri, celebra e resistencia di esunnan cu ta biba cu HIV, y campaña pa polisa inclusivo, nos por kita e ultimo bareranan no -medico pa elimina e epidemia, y asina asegura cu salud publico y sosten social yega na tur persona, tur caminda.
Den 2024, rond 40.8 miyon hende tabata biba cu HIV globalmente. Aproximadamente 630.000 hende a muri den 2024 pa motibo di HIV, y mas of menos 1.3 miyon hende a contrae HIV e aña ey.