Den conexion cu celebracion di su di 15 aniversario, Stichting Rancho ta dedica luna di april pa realisa un serie di actividadnan cultural y educativo enfoca riba herencia y identidad. Presidente di fundacion, Sr. Clifford Rosa, a declara cu durante periodo di 2025 te cu inicio di 2026, organizacion a experimenta un desaroyo nobo cu ta habri diferente oportunidadnan pa futuro.
Como parti di e programacion, dialuna 20 di april lo wordo realisa un minisimposio na Universidad di Aruba, enfoca riba intercambio academico, conscientisacion y practica relaciona cu conservacion di herencia cultural intangibel. Actividad lo enfatisá importancia di conocemento y reflexion riba herencia cultural y afrodescendencia den sociedad Arubano.
Ademas, pa dia 29 di april, Stichting Rancho, hunto cu Fundacion InspirArte Aain, lo organiza un viaje cultural pa La Guajira bou titulo: “Bek na Raiz”, cu meta di fortalece conexion cultural cu comunidadnan afro y indigena den region.
Intercambio academico y dialogo comunitario
E minisimposio ta forma parti di un intercambio academico continuo entre Aruba y La Guajira. Evento a bira posible danki na apoyo financiero di Herdenkingscomité Slavernijverleden, un fondo cu ta brinda sosten pa proyectonan relaciona cu historia di esclavitud y su impacto social.
Programacion lo cuminsa mainta cu presentacion di oradornan especialisa den diferente disciplina. Despues di merdia, lo sigui un seccion participativo hunto cu comunidad, den forma di taller y dialogo, cu meta di analiza, delibera y identifica desafionan y oportunidadnan rond di tematica di afrodescendencia na Aruba.
Organisadornan ta aspira cu e encuentro lo culmina den formulacion di un intencion concreto riba con pa atende y promove reconociemento di afrodescendencia na isla. Temanan cu lo wordo trata inclui historia di esclavitud, expresion musical, tradicion culinario y otro aspecto cultural cu forma parti di herencia historico di comunidad.
“E conexion cu nos raiz ta fundamental pa compronde nos identidad y pa construí un futuro mas consciente,” segun declaracion di presidente Clifford Rosa.
Oradornan invita
Apertura oficial di e minisimposio lo wordo haci pa presidente di Stichting Rancho. Entre e oradornan invita tin:
- Dr. Viola Heutger, kende lo presenta su ponencia di forma virtual
- Ramon Todd Dandaré, linguista
- Maria Isabel Cabarcas Aguilar, abogado, trahado social y gestor cultural di La Guajira
- Martin Lopez Gonzalez, psicologo social y miembro di Fundacion Evolucion Afro
- Guillermo Ojeda Jayariyu, escritor, artista plastico y coordinador di Hunta Mayor Autonomo di e Palabreronan (Pütchipü’ü) Wayúu
- Benedicta Deogratias, profesional na Universidad di Aruba cu ta enfoca riba derecho humano
Cada orador lo aborda e tema di afrodescendencia for di su propio perspectiva profesional y cultural, creando un espacio pa reflexion academico y dialogo constructivo.
Participacion habri pa publico
E minisimposio ta habri pa publico general. Personanan interesa por registra gratis via plataforma di medio social of website oficial di Stichting Rancho. Organisacion ta enfatisa importancia di registra na tempo, ya cu capacidad di e local ta limita y tin un grupo di invitado special confirma.