E ekipo di Bureau City Inspector, hunto cu e diferente instancianan envolvi den e control di autonan bieu riba caminda publico, ta continua cu nan accionnan intensivo rond di nos isla. Diabierna ultimo, e ekipo di control a desplega den e bario di Madiki, unda a tuma medida firme contra tur vehiculo bandona of cu no ta den uzo cu ta staciona riba tereno y propiedad publico.
Maikel Gomes, di Departamento di Relacion Publico (PR) di Bureau City Inspector, a elabora mas detayadamente riba e situacion aki y e meta di e accionnan continuo.
E accion aki ta forma parti di un esfuerso conhuntamente sosteni pa Ministerio di Promer Minister, Cuerpo Policial di Aruba y Bureau City Inspector. E obhetivo principal ta pa conscientisa y pidi cooperacion directo di comunidad pa cuminsa move y retira e vehiculonan aki for di tereno di gobierno, y cayanan di Aruba.
Segun Gomes a señala, hopi di e autonan aki ta keda staciona pa añanan largo,algun di nan pa tres, cuater of te hasta cinco aña consecutivo sin cu e doñonan ta haci uzo di nan of ta mantene nan. Sinembargo, momento cu e autonan di grua y e ekiponan di control presenta den e bario, e doñonan ta sali di diripiente pa purba move e vehiculonan of cuminsa core cu nan.
E presencia di e autonan staciona aki ta causa varios inconveniente grave den e barionan:
Obstaculo y Peliger di Trafico: E vehiculonan aki ta stanca fluho di trafico y ta limita e espacio sigur pa peatonnan y automobilistanan.
Molester pa Bisiñanan: Hopi keho ta drenta di habitantenan cu no por sali libremente for di nan mesun cas of cu ta hayando dificultad pa transita den nan caya debi na autonan parke riba caminda of cu ta garashinan informal di drecha auto den caya.
Uzo Inapropia di Propiedad Publico: Ningun persona no por apropia di un caya of tereno publico pa haci’e su espacio personal di parkeer of pa laga autonan bieu drumi dia den dia afo.
Bureau City Inspector ta recorda comunidad cu si un persona ta bay baha un hende, e por para un momento breve, pero no ta permiti pa laga vehiculonan inactivo staciona permanentemente dilanti cas riba tereno di gobierno. E unico luga unda un ciudadano tin derecho di mantene e tipo di vehiculonan aki ta dentro di su mesun cura of propiedad priva.
E departamento ta haci un apelacion directo y urgente na tur doño di auto cu tin vehiculo bieu of inactivo riba via publico pa nan haci e limpiesa necesario y retira nan mesora, pa asina mantene e barionan limpi, sigur y accesibel pa henter comunidad.
