Ministro Plenipotenciario di Sint Maarten, drs. Gracita R. Arrindell, a atende e presentacion di buki Nieuw Nederland, e bario serka Avila Beach Hotel, fundá riba honor i humiltat, organisa pa Fundacion OCAN riba diaranson 14 di augustus, na e Gabinete di e Ministro Plenipotenciario di Corsou na Den Haag.
Publica na 2023, e autor di e buki, Rensley Victoria, a nase y lanta den e bario di Nieuw Nederland na Corsou. E publicacion ta haci un contribucion importante na e historia oral di Corsou dor di documenta e recuerdonan, experencianan y e hendenan cu a wordo forma pa e bario unda nan a crece.
Pa e buki, a entrevista 12 persona di e area, incluyendo personanan cu tabatin un influencia positivo riba Victoria y su famia. Entre esnan presenta tin personanan prominente conecta na Nieuw Nederland, incluyendo ex-Prome Minister Maria Liberia-Peters, hunto cu residentenan cu nan storianan personal ta forma parti di e memoria colectivo di e bario.
E buki ta presenta na Papiamentu, Hulandes y Ingles, haciendo e historia di Nieuw Nederland accesibel na un audiencia mas amplio y yudando pa preserva e storianan aki pa generacionnan di futuro.
Pa Minister Arrindell, kende mes a lanta den Nieuw Nederland, e presentacion tabatin un nificacion personal special. El a destaca tambe e lasonan di hopi tempo entre e bario y Sint Maarten, apuntando cu personanan y famianan di desendencia di Sint Maarten tabata biba, y ainda ta biba, den e area ey.
“Nieuw Nederland ta forma parti tambe di mi famia su historia cu ta bin di Sint Maarten. Ta balorabel pa mira e bocanan y experencianan di su hendenan documenta y preserva. E publicacion aki ta corda nos tambe riba e conexionnan fuerte di famia y historico entre Corsou y Sint Maarten y riba e importancia di pasa e storianan aki pa generacionnan venidero,” Minister Arrindell a expresa.
Victoria a entrega un copia di e buki na Minister Arrindell, kende a felicita Rensley Victoria cu su contribucion valioso na e preservacion di historia oral di Corsou y a aplaudie e iniciativa pa garantisa cu e storianan, e hendenan y e spirito di comunidad di Nieuw Nederland no wordo lubida.