Minister encarga cu Energia, mr. drs. Arthur Dowers, a califica finalisacion di expansion di planta RECIP-3 di WEB Aruba N.V. como un paso importante pa fortalece siguridad y confiabilidad di suministro di energia na Aruba.
Diaranson mainta Minister Dowers tabata presente na ceremonia oficial di entrega di e proyecto, cu a representa un inversion di AWG 115 miyon. Hunto cu directiva di WEB Aruba y representante di Wärtsilä Finland Oy, Minister Dowers tabata un di esnan cu a primi e boton di start cu oficialmente a pone e dos motornan RECIP nobo den operacion.
Cu entrada den operacion di e dos motornan, capacidad di produccion di energia via RECIP ta aumenta di 194 MW pa 230 MW, brindando Aruba mas capacidad firme pa responde na e demanda creciente di energia.
Durante su discurso, Minister Dowers a expresa, na nomber di Gobierno di Aruba, agradecimento na Wärtsilä pa e cooperacion cu durante añanan a mantene cu WEB Aruba. El a reconoce tambe e directiva, empleadonan, ingenieronan y tur profesional cu a contribui na realisacion di un proyecto tecnico y logisticamente compleho.
Segun Minister Dowers, ora comunidad mira e instalacion final, no semper ta visibel tur e trabou cu tin tras di dje. Transportacion di e ekiponan grandi pa Aruba, instalacion, integracion tecnico y cumplimento cu diferente fecha limite a exigi un esfuerso considerabel di tur esnan involvi.
E mandatario a destaca p’esey cu ta particularmente positivo cu, apesar di e complehidad, e proyecto por ta completa un siman prome cu e fecha planifica.
Mas capacidad pa un Aruba cu ta sigui crece
Minister Dowers a pone e expansion den contexto di e crecemento cu Aruba ta experimentando y e presion adicional cu esaki ta pone riba suministro di energia.
Aumento den actividad economico, turismo y consumo, combina cu periodonan di calor intenso, ta significa cu demanda di energia ta sigui presenta un reto. P’esey, segun Dowers, Aruba mester tin suficiente capacidad y, mas importante ainda, planifica na tempo pa evita cu crecemento supera e capacidad disponibel.
“Nos a duna un paso importante pa garantisa siguridad di energia den nos pais,” Minister Dowers a enfatisa.
El a indica cu e responsabilidad di Gobierno ta pa crea e direccion, supervisa y vigila e maneho general, mientras cu e profesionalnan y experticio tecnico dentro di WEB ta carga e responsabilidad importante di ehecucion.
Minister a expresa su aprecio pa e nivel di conocemento y profesionalismo cu tin dentro di WEB, remarcando cu un suministro confiabel no ta algo cu un pais por tuma pa concedi. Na diferente parti di mundo, hasta paisnan cu tin mas recurso y escala, ta enfrenta reto pa satisface nan demanda energetico ora capacidad y planificacion no ta crece na e mesun ritmo.
Fundeshi pa siguiente paso den energia
Expansion di RECIP-3 ta brinda no solamente capacidad adicional, sino tambe un fundeshi mas fuerte pa e siguiente fase di maneho energetico di Aruba.
Cu e dos motornan nobo operacional, WEB ta den un posicion mas fuerte pa garantisa suministro mientras cu Aruba ta sigui prepara proyectonan relaciona cu energia renobabel y almacenahe, incluyendo mayor participacion di energia solar y di biento den e mix energetico.
Minister Dowers a felicita directiva y henter team di WEB, Wärtsilä y tur esnan cu a contribui na e proyecto.
Cu activacion oficial di RECIP-3, Aruba ta agrega capacidad nobo na su sistema energetico y, na mes momento, fortalece e base necesario pa un suministro mas confiabel y un futuro energetico mas sostenibel.
