E Minister di Finansas, e honorabel Marinka J. Gumbs, ta duna un actualisacion tocante e desaroyo recien relaciona cu e adaptacion di presupuesto 2025 y e preparacionnan cu ta tumando luga pa e presupuesto di 2026.
E minister a confirma cu e Conseho di Minister (COM) a aproba oficialmente e adaptacion di presupuesto pa aña 2025. E cambio aki ta refleha adaptacionnan den e presupuesto nacional pa adapt’e mas miho cu por cu e realidad economico actual y e desaroyonan financiero recien di e pais. E adaptacion ta inclui tanto cambio den e entrada como den gasto, pa asina e Gobierno di Sint Maarten por keda riba liña pa logra su metanan financiero como desaroyo pa e resto di e aña.
E adaptacion di Presupuesto 2025 a ser someti na e Comision pa Supervision Financiero (CFT) pa su conseho segun Articulo 11, conforme cu e proceduranan skirbi den e Ley di Reino pa Supervision Financiero (Rft). E proceso aki ta parti di e compromiso di Sint Maarten pa cu un bon maneho financiero, transparencia den finansas publico y cumplimento cu e presupuesto vigente bou di Rft.
Pa loke ta trata e presupuesto pa 2026, Ministerio di Finansa ta den fase di preparacion ainda. E meta ta pa e presupuesto 2026 wordo aproba den november 2025 door di e Conseho di Minister y despues e presupuesto lo keda someti na CFT pa revision di acuerdo segun Articulo 11 y eventualmente na Parlamento pa debate y aprobacion.
Minister Gumbs a reafirma cu e Ministerio di Finansas ta keda comprometi pa fortalece e posicion fiscal di Sint Maarten, mehora eficiencia den e sector publico y apoya iniciativa cu ta contribui na crecemento economico sostenibel y mehoracion di servicio publico.
Mas informacion lo wordo suministra na medida cu tanto e adaptacion di presupuesto 2025 como e presupuesto di 2026 ta avansa den nan etapa di revision y aprobacion.
Press release: Gobierno di Sint Maarten