Diadomingo atardi, Minister di Enseñansa y Deporte Endy Croes hunto cu Sra. Viola Heutger di Universidad di Aruba a sali pa un biahe di trabou na Toronto, Canada. E meta di e biahe aki ta pa firma MoU cu dos (2) college y un (1) universidad na Canada, cual ta Centennial College, Sheridan College y Ontario Tech University. Diaranson binidero, Minister Endy Croes lo reuni cu council general di Hulanda cu ta situa na Toronto, Sr. Harman Idema pa dialoga riba diferente topico. Despues Minister Endy Croes ta biaha na Tampa, Florida na Merca, unda lo firma dos MoU mas cu University of South Florida y Florida Institute of Technology. Durante siman e mandatario di Enseñansa lo duna mas informacion di e biahe di trabou aki y di e acuerdo cu a haci cu e scolnan menciona. Minister Endy Croes ta gradici Minister Plenipotenciario na Washington, Sra. Joselin Croes pa haci un tremendo trabou y habri porta pa firma e acuerdonan aki. Minister Endy Croes ta expresa di ta hopi contento pa mira resultado di e acuerdo aki entre Aruba y cinco (5) diferente scol grandi di Canada y Florida, cu lo brinda nos studiantenan di Aruba oportunidad di bay studia na un di e scolnan aki cu un miho tarifa.
Comunicado Minister di Enseñansa y Deporte Endy Croes