E meta di e evento deportivo aki tabata pa genera fondo pa yuda Perla Gymnastics renoba su vloer.
Diabierna ultimo, a tuma luga e ceremonia di apertura di e prome Charity Kickball Tournament organisa pa Kiwanis Club of Young Professionals Aruba (KYPA) na Flatstone Ballpark. Sr. Rodymar Geerman di Ministerio di Deporte a representa Minister di Enseñansa y Deporte Endy Croes den e ocasion aki. E torneo a inicia dia 29 di september 2023 y a culmina 1 di october 2023. E meta di e torneo aki ta pa recauda fondo pa yuda renoba e vloer di Perla Gymnastics. Kiwanis Club of Young Professionals Aruba tin un team di profesional y dinamico cu ta organisa diferente evento pa genera fondo pa yuda e mucha- y hobennan den necesidad. E ekiponan cu a participa den e torneo aki tabata, entre otro, KPA, N.V. ELMAR Aruba, WEB Aruba N.V., SETAR NV, Aruba Airport Authority, Te Paden y Red Machine. Minister Endy Croes ta felicita ful e team di Kiwanis Club of Young Professionals Aruba cu a organisa e tremendo evento deportivo aki y ta desea Perla Gymnastics hopi exito cu nan proyecto!
