Minister di Asuntonan Economico, Comunicacion y Desaroyo Sostenibel, mr. Geoffrey Wever ta anuncia cu lo continua exploracion di e potencial economico di un Fast Ferry entre Aruba y Corsou. Riba peticion conhunto cu Minister di Transporte, Ursell Arends, conseho di minister a duna su aprobacion pa explora introduccion di un ruta maritimo entre Aruba y Corsou.
E impacto di e pandemia di corona y subida di gasto di cargo y transporte riba economia di Aruba a acentua aun mas e necesidad pa crea mercadonan nobo y expande mercadonan existente via e sector maritimo. Desaroyo di e sector maritimo lo stimula mas comercio, inversionan y expande opcionan di productonan pa e consumidor. Esaki ta na beneficio di e desaroyo economico di Aruba.
Exploracion di e introduccion di un Fast Ferry lo wordo hasi door di un experto riba e area maritimo Ton Jansen cu tin experticio y experiencia amplio riba introduccion di Fast Ferry den Caribe. Ton Jansen tawata forma parti di e introduccion di un Fast Ferry entre Saba y Sint Eustatius den 2021.
Ambos minister Ursell Arends y Geoffrey Wever ta kere cu e sector maritimo ta hunga un rol esencial den crecemento y diversificacion di economia di Aruba. Pa e motibo aki ta importante pa explora si ta factibel introduci un Fast Ferry entre Aruba y Corsou.
