Stichting Monumentenfonds Aruba a conmemora su 30 aniversario durante un ceremonia special na Iglesia Comunitario, unda enfoke principal tabata riba preservacion di patrimonio historico y e futuro restauracion di un di e monumentonan mas reconocibel di Aruba.
Durante e anochi, representantenan di Gobierno di Aruba, Monumentenfonds Aruba, Comunidad Protestant y Fundacion Iglesia Comunitario a reuni pa marca oficialmente e siguiente fase den e trayecto preliminar relaciona cu futuro desaroyo y preservacion di Iglesia Comunitario.
Un firma simbolico! Conforme cu e aclaracionnan huridico brinda posteriormente, e documentacion firma durante e ceremonia ta forma parti di un proceso preliminar administrativo y no ta representa ainda un traspaso formal finalisa. E proceso legal y registracion oficial di documentonan lo sigui den e siguiente fase administrativo.
Entre e representantenan presente tabata Prome Minister Mike Eman, Minister di Infrastructura Rene Herdé, miembro di directiva di Monumentenfonds Aruba, representantenan di Comunidad Protestant y directiva di Fundacion Iglesia Comunitario.
Un parti importante di e programa tabata e presentacion di directora saliente Anne Witsenburg, kende a comparti e vision di restauracion pa Iglesia Comunitario y a enfatisa e necesidad urgente di tuma accion pa evita deterioro adicional di e edificio historico.
Segun Witsenburg, e proyecto di restauracion lo ta desaroya den cuatro fase. E prome fase ta enfoca riba trabounan urgente manera reparacion di dak y solucion di problema structural. Otro fasenan ta inclui mehoracion di facilidadnan, restauracion di espacio exterior y finalmente restauracion completo di Iglesia Comunitario.
Durante e celebracion tambe a anuncia cu firma di arquitectura Archiosa Architects lo desaroya e diseño completo pa restauracion di e compleho sin costo, como un contribucion na preservacion di patrimonio nacional.
E ceremonia a sirbi tambe como un momento di reconocemento pa e trabou cu Monumentenfonds Aruba a realisa durante e ultimo 30 aña den preservacion di monumentonan y edificionan historico riba Aruba.
Den su mensahe, Prome Minister Mike Eman a enfatisa cu conservacion di patrimonio historico ta esencial pa mantene identidad y memoria colectivo di pueblo Arubiano.
“Den un mundo cu ta cambiando rapidamente, monumentonan ta yuda nos corda ken nos ta y di unda nos ta bin,” asina Eman a expresa.
Segun e Prome Minister, preservacion di monumentonan no ta solamente trata di conserva piedra y edificio, pero tambe di proteha e historia, experiencia y baloronan cu a forma Aruba y su comunidad durante generacionnan.
Na final di e anochi, Monumentenfonds Aruba a expresa gradicimento na comunidad, partnernan y boluntarionan cu durante tres decada a contribui na preservacion di herencia cultural di Aruba, reafirmando su compromiso pa sigui proteha patrimonio nacional pa futuro generacion.
