Konseho Insular a aseptá e moshon akí unánimamente
Den un reunion di toma di desishon di Konseho Insular ku a tuma lugá riba djárason 10 di sèptèmber 2025, e lider di frakshon di partido MPB Hennyson Thielman a presentá un moshon den kua e ta boga pa gobièrnu di Boneiru bini ku un programa pa hendenan djafó ku bin biba nobo na Boneiru i ku no ta papia papiamentu, haña oportunidat pa siña nos idioma i tambe tokante nos normanan, balornan i kustumbernan. E moshon akí a keda aseptá unánimamente. Durante su presentashon Thielman a trese dilanti ku e último selebrashon di Dia di Boneiru a lanta hopi diskushon tokante nos normanan, balornan i kustumbernan komo isla. E diskushonnan akí tin di haber ku kresementu eksplosivo di Boneiru su poblashon den e último añanan, miéntras ku sifranan resien di CBS ta duna un indikashon ku ya kaba nos ta na 27 mil habitante na Boneiru. Kada biaha mas i mas suidadano nobo ta bini nos isla pa duna un aporte i traha den diferente sektor.
Peliger di pèrdida di identidat
Den su moshon Hennyson Thielman ta trese tambe dilanti ku hopi di e siudadanonan nobo akí no konosé nos idioma, ni nos norma- i balornan. Alabes el a mustra riba e echo ku papiamentu ta e idioma materno na Boneiru i ta sumamente importante pa nos konservá esaki na Boneiru no opstante kresementu di nos poblashon. Mas aleu Thielman ta menshoná ku na momentu ku mas siudadano nobo ta bin biba na Boneiru, nos ta kore peliger ku nos norma- i balornan komo isla lo bira ménos visibel dia pa dia si nos no duna esaki atenshon. Ademas por opservá ku hopi di nos hóbennan ku ta lantando awor akí no konosé nos norma- i balornan manera antes.
Kurso di integrashon di kampaña di konsientisashon
A base di e alegashonnan akí di Hennyson Thielman, lider di frakshon di MPB, den forma unánime Konseho Insular a bai di akuerdo pa urgi Kolegio Ehekutivo pa krea un programa di kurso pa siña papiamentu i tambe tokante e norma- i balornan ku ta vigente na Boneiru. Tambe Konseho Insular ta pidi Kolegio Ehekutivo pa huntu ku e programa akí hasi un kampaña di konsientisashon pa loke ta trata importansia di papiamentu komo idioma na nos isla i importansia di nos norma- i balornan. Un otro petishon ta pa Kolegio Ehekutivo hasi e programa akí visibel pa tur hende ku bin biba na Boneiru por mira esaki i keda motivá pa partisipá.
Kondishon pa traha na Boneiru
Pa medio di e moshon akí Konseho Insular ta pidi Kolegio Ehekutivo tambe pa manda korespondensia pa instansianan na Boneiru manera RCN, Fundashon Mariadal, Mental Health Caribbean, Akseso, JICN i otro instansianan pa pone komo kondishon obligatorio ku trahadónan prosedente di otro pais i ku no ta dominá nos idioma papiamentu, mester partisipá na e programa aki. E programa i kampaña aki mester stimulá nos hendenan lokal tambe pa na un manera respetuoso motivá siudadanonan nobo pa partisipá na e programa i tambe pa papia papiamentu ku nan. Ku tempu e programa por ekspandé i no enfoká solamente riba idioma, pero tambe riba músika lokal, gastronomia, fiestanan tradishonal i historia di Boneiru.