CuracaoInternacional

Nationale ombudsman: Studiantenan karibense ta pega pa motibu di opstákulonan práktiko

Nl Ombudsman 1

Tur aña mas o menos 1.600 hoben di Kòrsou, Aruba, St. Maarten i Hulanda Karibense ta yega Hulanda tur entusiasmá pa kuminsá ku nan estudio. Lástimamente hopi studiante ta bin topa tur sorto di opstákulo anto p’esei nan no ta logra nan meta. Nationale ombudsman a investigá kua e opstákulonan ta ku e hobennan talentoso akí ta eksperensiá na Hulanda. Na hopi okashon, kos ta bai robes durante e preparashonnan kaba, anto una bes na Hulanda e studiantenan karibense akí ta topa opstákulo no solamente den kasonan práktiko manera bibienda, seguro di kuido i studio pero tambe riba e área kultural. Dosentenan i ko-studiantenan tin tiki atenshon pa e grupo spesífiko akí. Despues di nan estudio hopi biaha nan ta keda atras k’un debe di estudio problemátiko.

 

Nationale ombudsman, señor Reinier van Zutphen, ta hasi un yamada na gobièrnunan di Reino pa resolvé e problemanan ku studiantenan karibense ta enkontrá. “E hobennan akí ta di gran importansia pa futuro di e islanan. Ta importante pa nan estudio na Hulanda forma un base positivo pa un karera eksitoso sea na kas òf na Hulanda. Ta p’esei tin biaha nan mester di èkstra sosten. Instanshanan (di gobièrnu) no por presumí ku e hobennan akí ta kompletamente outosufisiente i ku nan sa kon e sosiedat kompliká hulandes akí ta funshoná.”

 

“Studia na Hulanda mester ta un eskoho konsiente pa hobennan karibense. No tur hende a nase pa esei. Pero esnan ku ke tuma e paso akí konsientemente, no mester haña nan mes ku tur tipo di blokeo durante esaki. Un bon preparashon na e islanan ta mashá importante pa esaki. Pa e motibu ei huntu ku e defensornan di pueblo di Kòrsou i Sint Maarten, mi ke papia ku e gobièrnunan di Reino pa prepará e studiantenan akí muchu mas mihó pa nan estudio i e komunidat hulandes.”

 

For di e estudio ‘Dolor di kabes di studiante karibense’ di Nationale ombudsman bou di 624 (èks) studiante di e parti karibense di Reino, a sali na kla ku hopi studiante ta topa diferente tipo di problema promé ku, durante i despues di nan estudio na Hulanda. Nan ta haña masha tiki guia den e proseso di skohe un estudio, nan no ta haña un BSN di antemano, nan no tin derecho riba seguro di kuido hulandes, anto nan no konosé e sistema di impuesto i ‘toeslagen’. Nan mester kustumbrá ku e kultura i sosiedat hulandes, anto hopi biaha nan ta akumulá debenan di estudio problemátiko.

 

P’esei Nationale ombudsman ta pidi gobièrnu, en espesial minister Van Engelshoven (OCW), sekretario di estado Knops (BZK) i nan koleganan riba e islanan, pa hasi tur loke ta den nan poder p’asina e fasenan promé ku, durante i despues di estudio, bira mas simpel posibel pa studiantenan karibense. Nan mester tuma e inisiativa pa kolaborá p’asina kita blokeonan práktiko, anto pa prepará studiantenan mihó i guia nan durante nan estudio na Hulanda. Reinier van Zutphen ta splika: “E ehèmpelnan ta doloroso. Si atendé debidamente ku e opstákulonan akí, por evitá ku futuro studiantenan karibense ta bin topa e mesun problemanan, anto nan por kuminsá eksitosamente na nan karera ku e estudio ku nan a sigui na Hulanda.”

 

E opstákulonan mas importante for di e investigashon ‘Dolor di kabes di studiante karibense’

 

Insufisientemente prepará

Pa hopi studiante karibense ta difísil pa kustumbrá ku e bida di estudio na Hulanda. Promé ku nan bin Hulanda nan no tin un bista kompleto di: e estudio, kon ta pa studia, e kultura, e klima, e idioma, anto e struktura di impuesto i ‘toeslagen’.Tur kos ta otro kompará ku loke nan tabata kustumbrá kuné na kas. E investigashon ta mustra ku hopi biaha e studiantenan no ta bon prepará pa tuma e paso akí. 26% ta sinti nan mes poko te asta mashá mal prepará pa nan estudio na Hulanda.

 

Un studiante ta bisa: “Ta enfoká mashá riba skohementu di un estudio i un skol adekuá. Pero no riba kon bida na Hulanda ta.”

 

No tin burgerservicenummer (BSN)

Studiantenan mester por hasi preparashonnan práktiko na e islanan promé ku nan biahe. Esei ta konta sigur tambe pa posibilidat di regla kosnan ku mester por keda reglá di manera digital promé ku e estudio kuminsá. Aworaki esei ta imposibel pasó e studiantenan akí no tin burgerservicenummer (BSN) anto nan ta haña esaki te ora nan inskribí nan mes na Hulanda den e Basisregistratie Personen (BRP) numa. P’esei por ehèmpel nan no por inskribí na un estudio na nivel di mbo òf habri un kuenta bankario. Tambe hañamentu di bibienda ta problemátiko. Reinier van Zutphen: “Algun problema ta konta pa tur hende ku ta studia na Hulanda. Pero den práktika kosnan ta mihó reglá pa studiantenan internashonal pa ku e studiantenan karibense.”

 

Eksluí for di e seguro di kuido hulandes

Studiantenan karibense ta keda eksluí for di e seguro di kuido hulandes. Komo ku nan no tin seguro di kuido hulandes nan no ta bini na remarke pa zorgtoeslag. Anto tòg hopi studiante una bes na Hulanda, ta apliká pa seguro di kuido i e ‘toeslag’ korespondiente. Anto una bes sali na kla ku nan no tabatin derecho riba esaki, nan mester paga montantenan grandi bèk.  Studiantenan karibense ta kore riesgo ku nan ta haña nan mes den problema finansiero grandi pasobra nan no ta konosí ku e legislashon i  regulashon hulandes rondó di ‘toeslagen’ i impuestonan (di gemeente).

 

Kustumbrá ku e sosiedat hulandes

E transishon pa Hulanda ta grandi. No únikamente relashoná k’un retraso lingwístiko, pero spesialmente pa motibu di diferensia kultural. E echo ku nan no tin konosementu di nan derecho- i debernan ta duna nan un sintimentu di alienashon i impotensia anto aparte di esaki tin biaha nan ta haña nan tin ku situashonnan di diskriminashon i eksklushon. Mas ku mitar di e studiantenan entrevistá tabatin retraso den nan estudio. Anto un di e motibunan prinsipal p’esaki ta di origen sígiko. Nan no tin un ret sosial ku por akohé nan, anto di nan mes no ta pidi yudansa fásilmente. Instansianan na Hulanda ta parse di ta poko konsiente di e shòk kultural ku e studiantenan karibense ta pasa aden ora nan yega Hulanda. Konsekuentemente un parti di e studiantenan akí no tin akohida òf ret sosial, anto nan ta bira depresivo. Reinier van Zutphen: “E studiantenan karibense akí tin mester di guia. Di organisashonnan ku ta yuda studiantenan, pero tambe di dosentenan ku ta realisá nan mes kuantu opstákulo èkstra e studiantenan akí mester dil kuné.”

 

Debe (di estudio)

Un kantidat relativamente haltu di studiantenan karibense no ta kaba nan estudio, ta kambia mas biaha di estudio òf tin retraso den nan estudio. Parsialmente pa e motibunan akí nan ta krea debenan (di estudio) haltu. Banda di esei mayoria di studiante karibense a sera no solamente un fiansa di estudio ku DUO, sino tambe un fiansa di estudio lokal pa por bin studia na Hulanda. Sin e fiansa(nan) akí nan no por lora finansieramente. Studiantenan karibense no ta logra haña i/òf mantené un bon trabou. Ademas, ku e situashon aktual di e pandemia di Covid-19 hopi djòp di studiante ta disparsé. Kasi mitar di e (èks) studiantenan ku ta pagando nan debe di estudio bèk na e momento akí, ta indiká ku esaki ta (mashá) difísil. Komo ku mayoria di nan tin mas fiansa (di estudio) i instansianan no ta tene kuenta ku esei (sí ta tene kuenta ku e asina yamá opstarttoelage pa studiante ku ta bini di Hulanda Karibense) e montante total ku mester paga pa luna bèk, hopi biaha ta mas haltu ku nan kapasidat finansiero. Esei ta konta sigur pa studiantenan ku ta regresá na e islanan i no ta haña un trabou ku kua nan por paga nan debenan. Esaki ta impedí un gran parti di èks studiante pa bai Karibe bèk.

Related posts

A duna señal pa kuminsá ku renobashon di matadero na Boneiru

EA News Author

Detenshon relashona ku ladronisia di outo

EA News Author

Lo bay injecta 20 miyon euro den enseñansa , pero no tin vicion ni direccion pa cu enseñansa na Corsou

EA News Author

Leave a Comment

Whatsapp Message