Den e siman tras di lomba (riba djamars i djaweps),Promé Minister Rhuggenaath a kumpli ku su último tareanan komo presidente di e Asosiashon di Pais i Teritorionan Ultramar (Overseas Countries and Territories Association- OCTA). Den kuadro di medidanan di Covid, ámbos enkuentro a tuma lugá di forma virtual.
Djamars dia 8 di desèmber, Minister Rhuggenaath a presidensiá e Konferensia Ministerial. Por a sigui e konferensia aki virtual, ku partisipashon di Pais i Teritorionan for di Oséano Pasífiko, Oropa, Oséano Atlántiko i Teritorio Karibense. Durante di e Konferensia Ministerial aki, a para ketu riba e trabounan di OCTA durante e periodo tras di lomba. Bou di presidensia di Kòrsou, Paisnan i Teritorionan Ultramar a aseptá un ‘Ocean Declaration’ na luna di òktober 2019 na Brusselas, ratifikando ku tur pais lo tin atenshon pa konservashon di Oseano i desaroyonan rondó di Ekonomia Blou.
Tambe a lansa i finalisá diferente estudio na benefisio di e Pais i Teritorionan Ultramar riba tópikonan manera Energia, programanan di Union Oropeo, ‘Blue Economy’ i migrashon. Aparte di esaki, e kontakto entre e islanan a keda fortalesé ku intervenshon di e Komité Ehekutivo i a traha duru na engrandesé e visibilidat di OCTA entre otro pa medio di partisipashon na foronan internashonal importante manera ‘Climate Change Conference’ (COP25) i ‘EU Sustainable Energy Week’.
Un punto di agènda sumamente importante durante e Konferensia Ministerial, tabata tambe e partida di e teritorionan Britániko komo konsekuensia di Brexit i impakto riba e asosashon di Paisnan. Pa finalisá, elekshonnan a tuma lugá pa diferente di e funshonnan pa e periodo di 2020-2021 i nos Promé Minister a traspasá e presidensia na Nuevo Caledonië. Kòrsou a wòrdu skohé atrobe komo miembro di e Komité Ehekutivo (ExCo) ku ta guia tareanan diario di e asosashon di OCTA.
Despues di e Konferensia Ministerial, a sigui e foro di Union Oropeo riba e tópiko di Paisnan i Teritorionan Ultramar riba djaweps dia 10 di desèmber. E konferensia aki, a konta ku partisipashon di miembronan di Komishon Oropeo, inkluso Eurocommissaris Urpilainen i nashonnan miembro (Dinamarka, Fransia i Hulanda).
Promé Minister Rhuggenaath a suprayá durante su diskursonan e importansia di solidaridat i koperashon entre e paisnan pero tambe e relashon entre Union Oropeo i LGO i e balor di e LGO-nan pa Union Oropeo.
