A dediká e Olimpiada pa Grandinan ku ta bai tuma lugá dia 14 di yüni 2025 na Alexander ‘Chandi’ Trenidad. Terrence de Jongh, hefe di INDEBOB, a anunsiá e eskoho pa Trenidad durante un konferensia di prensa riba djárason 4 di yüni 2025. E hende grandinan den e diferente barionan di Boneiru a skohe señor Trenidad kende tin 89 aña, pa motibu ku tur siman fielmente e ta hasi ehersisio físiko na Sentro di Bario Tera Kòrá. Hopi persona di 60 aña bai ariba ta mira Trenidad komo un ehèmpel briante. E ta enkurashá hende grandi pa keda den moveshon.
Durante e konferensia di prensa De Jongh a anunsiá ku dia 14 di yüni 2025 representantenan for di Aruba i Kòrsou tambe lo ta presente. E representantenan akí ta na Boneiru pa haña un idea di kiko un Olimpiada ta enserá. INDEBON ke wak tambe si ta posibel pa den futuro tene e weganan na Boneiru ku partisipantenan for di Aruba i Kòrsou.
Aña pasá, despues di mas òf ménos 15 aña, a bolbe tene un Olimpiada na Boneiru. Esaki tabata un éksito grandi. Na final hopi partisipante a pidi pa di awor en adelante organisá e evento akí tur aña. ‘Pa nos e Olimpiada ta un manera pa mustra nos apresio pa nos hende grandinan. Nos t’akinan awor akí, pasobra nan a bai nos dilanti,’ segun deklarashon di De Jongh.
Dia 14 di yüni ta buska e partisipantenan ku bùs den nan bario. Ora e partisipantenan yega Sentro Deportivo Jorge Nicolaas, tin un desfile promé. Chandi Trenidad ta karga e antorcha di e weganan. E partisipantenan ta desayuná promé i despues di esei nan ta partisipá na e weganan.
Pa 12 or tin un pousa pa lùnch. Despues di mèrdia tin entrega di premio i for di 15:00 or e partisipantenan por balia riba músika di Foyan Boys. E evento deportivo akí a bira posibel, danki na kontribushon di Fundashon Wega di Number Boneiru – FWNB i Entidat Públiko Boneiru.