E luna aki, lider den e tereno di konservashon marítimo di region Karibense a reuní na Kòrsou pa un tayer intensivo riba solushonnan di finansiamentu sostenibel pa área protehá. E evento di 3 dia, organisá entre Blue Marine Foundation, Blue Nature Alliance i Dutch Caribbean Nature Alliance (DCNA), a uni managers di parkenan marítimo i profesionalnan di konservashon for di dies isla Karibense.
Representantenan di tur seis isla di Hulanda Karibense a tuma parti hunto ku delegadonan di St. Vincent i Grenadines, Barbados, Repúblika Dominikana i St. Kitts & Nevis. Durante e tayer tabatin seshon di kolaborashon, presentashon di eksperto i planifikashon stratégiko pa enfrentá e desafionan grandi di finansiamentu ku ta desafiá e esfuersonan di konservashon marítimo den e region.
Partisipantenan a haña informashon riba diverso mekanismonan di finansiamento, basá riba kasonan den region i global ku por sirbi komo modelo pa e ekosistema marítimo úniko ku ta e ekosistema di Karibe. A enfoká riba oportunidatnan i kolaborashon, mostrando kon kambio intensioná por krea un efekto domino den esfuersonan di konservashon.
“E evento aki tabata hopi motivador,” segun Clare Brook, CEO di Blue Marine. “Dies isla Karibense a bini huntu pa kompartí nan desafionan i preokupashonnan, spesialmente falta grave di finansiamento i kapasidat pa e trabou vital di konservashon den e region. Nos a sali ku un sortido di solushonnan kreativo i innovativo ku tin e potenshal pa hinka finansiamentu signifikante pa protekshon marítimo den e region. Den nos esfuerso konhunto pa protehá 30% di e laman pa 2030, Laman Karibense ta bira e ‘Laman di Speransa!'”
E inisiativa “30 pa 30” ta representá un kompromiso global pa protehá minimalmente 30% di e laman mundial pa 2030. E meta ambisioso aki ta trata pa protehá biodiversidat marítimo, reforsá resistencia di ekosistema kontra kambio klimátiko i garantisá medio di bida sostenibel pa komunidatnan na kosta. “Kambio signifkativo ta sosodé ora ku nos ta tende, traha huntu i pone e hende ku konosé e medioambiente mihó na e sentro. Na Blue Nature Alliance, nos ta kere ku finansiamento pa konservashon ta un faktor esensial, ku mester soporta prioridatnan dirigí pa islanan i amplia solushonnan regional. E desishonnan ku nos ta tuma awor ta importá, pa e laman i pa tur komunidat ku ta dependé di dje,” Sarah Elsaid, Lider Regional, Blue Nature Alliance, a bisa.
“Dutch Caribbean Nature Alliance ta kere firmemente ku kolaborashon regional ta e klave pa un finansiamentu sostenibel pa konservashon,” segun Arno Verhoeven, direktor di DCNA. “E tayer aki a duna un bista krusial riba e diversidat di strategianan di konservashon ku ta wòrdu implementá na e islanan Karibense. Dor di aliniá nos esfuersonan, nos a tuma un promé paso importante pa desaroyá mekanismonan di finansiamento mas fuerte. Nos ekosistema marítimo kompartí ta eksigí solushonnan kompartí.”
E tayer a tabata un oportunidat balioso pa paisnan partisipante di kompartí nan eksperiensia, selebrá e eksitonan den konservashon i desaroyá strategianan huntu pa vense desafionan kompartí. Partisipantenan a sali ku plan konkreto pa implementá mekanismonan di finansiamentu sostenibel adaptá na nan ekosistema i konteksto ekonomiko.
Tokante e organisadornan:
.Blue Marine Foundation ta un organisashon benéfiko di konservashon marítimo na Reino Unido ku a ser establesé na 2010 pa un parti di e ekipo tras di e dokumental galardoná ‘The End of the Line’. Blue Marine ta dediká na enfrentá sobrepeska, un di e problemanan ambiental mas grandi di mundu, i tin komo mishon restaurá salut di laman dor di protehé i restaurá e medio ambiente marítimo. Su mision ta pa garantisá protekshon efisiente di minimo 30% di e laman pa 2030 i maneho sostenibel di henter laman.
.Blue Nature Alliance ta un inisiativa global ambisioso ku ta traha pa acelerá e ritmo, skala i efektividat di protekshon di 5% di e laman mundial, òf 18M km², pa 2027, dor di kolaborashon i inovashon dirigí pa su partnernan.
.Dutch Caribbean Nature Alliance ta e netwerk regional di área protehá i organisashonnan di konservashon riba e islanan Hulanda Karibense: Aruba, Boneiru, Kòrsou, Saba, Sint Eustatius i Sint Maarten.
