E crisis di infrastructura den departamentonan di Rijbewijs y husticia a tuma un birada mas serio. Trahadonan a expresa nan profundo frustracion cu loke nan ta yama un “historia largo di promesa bashi”, unda proyectonan pa edificio nobo ta wordo presenta, y despues cancela silenciosamente, lagando e personal den condicionnan precario.
E Weg’i Stoel entre Ministernan
E personal a relata con e speransa pa un miho luga di trabou a pasa di un man pa otro sin ningun resultado concreto. E proyecto original pa un edificio nobo (Codemsa) a cuminsa bou di ex-minister Andin Bikker, a pasa pa ex-minister Tjon, y awor ta bou di responsabilidad di Minister Tocco.
Sinembargo, e noticia mas recien cu a drenta cerca e trahadonan ta desastroso: e proyecto di e edificio di Codemsa a wordo cancela. Segun informacion ricibi, gobierno ta considera e proyecto “hopi caro” pa wordo realisa of tuma over. Despues di añanan di planificacion pa duna Cuerpo Policial y departamentonan di husticia un cas digno, e trahadonan ta sinti cu nan a keda cu “aros con coco”.
Peliger pa Seguridad di Aruba
E keho no ta trata solamente di comodidad, sino di e capacidad pa proteha e isla. E trahadonan ta enfatisa un punto clave: si kier mantene Aruba como un di e islanan mas safe den region, mester cuida e personanan cu ta encarga cu e siguridad ey.
“Si bo kier siguridad, bo mester tene e trahadonan di siguridad na pecho. Algo cu nos no ta sinti cu ta pasando actualmente,” Presidente di sindicato SPA a declara
“Cansancio di Potret y Palabra Bunita”
E sentimento general den e departamento ta uno di desilusion total. E trahadonan ta señala cu nan ta cansa di mira ministernan bishita e luga, papia bunita y saca potret pa publica, mientras den realidad nan tin mas di un aña ta spera riba un contesta di e mandatario actual sin mira ningun proyecto finalisa.
- Insaludabel: Presencia di schemel y falta di higiena ta afectando salud di e coleganan.
- Deterioro Fisico: Airconan cu no ta funciona y blafon cu ta biniendo abou.
- Falta di Respet: E personal ta pidi pa wordo tuma na serio, ya cu nan a yega na nan limite.
No kier mas “papia hopi”, kier accion. E situacion a bira un asunto di urgencia nacional, caminda e falta di un edificio adecua pa duna servicio publico y pa e polisnan por traha den un ambiente saludabel.