Parlamentario di AVP, Ing. Carlos Bermudez, ta expresa su satisfaccion cu e iniciativa di Minister di Turismo, Transporte, Sector Primario y Cultura, mr. Wendrick Cicilia, pa instala boeinan artificial na diferente punto strategico den lama cu e meta di atrae mas pisca y fortalece sector di piscamento na Aruba.
Segun Bermudez, e tipo di inversion aki ta representa un paso concreto pa duna apoyo na un sector cu ta di gran importancia pa Aruba. “Ora tin mas oportunidad pa gara pisca, nos ta contribui na un industria mas fuerte, mas productivo y mas sostenibel, loke finalmente ta beneficia tanto nos piscadonan como nos comunidad,” el a expresa.
Bermudez a resalta cu piscamento ta un profesion cu ta exigi hopi sacrificio, dedicacion y perseverancia. “Cada biaha cu un boto ta sali riba lama, ningun hende no sa cu siguridad con e dia lo termina. Tin costo, riesgo y hopi incertidumbre. P’esey nos mester aprecia e esfuerzo cu nos piscadonan ta haci tur dia pa pone pan riba mesa di nan famia y pa suministra Aruba cu pisca fresco di calidad,” el a declara.
E parlamentario a indica cu consumidornan semper tin libertad di scoge si nan kier cumpra un producto of no, pero el a enfatisa cu ta importante pa compronde e realidad economico cu nos piscadonan ta enfrenta. “Hopi biaha hende ta critica prijs di pisca sin tuma na cuenta e costo di combustibel, mantencion di boto, ekipo, ora di trabou y e riesgo cu ta bay cu cada salida riba lama.”
Bermudez a comparti cu e tema aki ta touch e personalmente. Durante su hubentud regularmente a subi lama cu su difunto tata, Dominico “Do” Bermudez, un experiencia cu a lag’e conoce di cerca e realidad, e orguyo y e reto diario cu caracteriza e bida di un piscado.
Den e mesun contexto, Bermudez ta haci un apelacion na comunidad di piscadonan pa sigui fortalece unidad y respet mutuo, specialmente den discusionnan importante tocante futuro di e sector, manera e proyecto di Marine Park. Segun e parlamentario, dialogo habri, respetuoso y constructivo ta e miho caminda pa proteha tanto interes di nos piscadonan como di nos medio ambiente.
Finalisando, Bermudez a expresa su gratitud na tur piscado di Aruba pa e solidaridad cu nan ta demostra constantemente. “Na momentonan dificil nos ta mira con piscadonan ta sostene y yuda un otro. E spiritu di compañerismo y apoyo mutuo ta un balor cu nos mester sigui cultiva. Hunto nos ta mas fuerte.”
