Ora un sala ta yen di pregunta, preocupacion y sugerencia, un cos ta cla: pueblo kier informacion y pueblo kier participa. Esaki tabata precisamente e resultado di e anochi di informacion riba HOFA y LWHO, organisa pa Fraccion di PPA. Segun lider di fraccion Eduard Pieters, e meta principal no tabata debate ni politica partidista. E meta tabata simpel: duna informacion y scucha loke comunidad tin pa bisa. Y esey a logra.
Durante dos ora di informacion y intercambio, e comerciantenan y representante di diferente sector a haci pregunta relevante, a comparti preocupacion y a ofrece sugerencia cu awor ta forma parti di e informacion cu e parlamentarionan por uza den nan trabou.
“Nos no a solamente a duna informacion. Nos a haya informacion tambe,” Pieters a enfatisa.
Un dialogo cu a produci resultado
Pieters a expresa su gratitud na tur e comerciantenan y esunnan presente, cu a tuma nan tempo, pa participa activamente durante e anochi aki. Segun Pieters, e aporte di e sector comercial ta di balor incalculabel, pasobra ta precisamente e grupo aki diariamente ta sinti e impacto di e decisionnan economico y financiero cu Parlamento tuma.
Tambe e lider di PPA a gradi Drs. Jose Fernandes, kende a asumi e rol di moderador di forma hopi profesional, imparcial y respetuoso, garantisando cu e encuentro a cana den un ambiente di orden y respet mutuo. Un reconocemento special tambe a bay na lider di fraccion di MEP, cu a acepta e invitacion pa participa y comparti informacion cu e publico presente.
Si HOFA pasa, Aruba ainda tin un papel decisivo
Durante e encuentro, un di e preguntanan central tabata: kico ta sosode si HOFA finalmente pasa den Tweede Kamer? Segun Pieters, e punto aki mester ta poni den su contexto corecto. “E momento cu Parlamento Hulandes tuma un decision, e decision ey mester ta basa riba informacion completo y corecto. No riba e percepcionnan ni presion politico.”
Pieters a enfatisa, cu ainda si e Consensusrijkswet HOFA pasa na Hulanda, Parlamento di Aruba ainda tin un rol fundamental. Sin aprobacion di e ley local, esta e Landsverordening Waarborging Houdbare Overheidsfinanciën (LWHO), e elaboracion y ehecucion practico di HOFA no lo sosode.
Informacion no ta daña democracia, sino fortific’e
Pa Fraccion di PPA, e resultado principal di e anochi tabata confirma un principio simpel, pero poderoso: informacion nunca ta un amenaza pa democracia. Un pueblo bon informa ta un pueblo cu por tuma e posicionnan consciente. Y precisamente p’esey, segun Pieters, dialogo, participacion y transparencia mester sigui ocupa un lugar central den e discusion nacional tocante HOFA, autonomia y futuro di Aruba.