Cu solamente simannan pa bay prome cu 1 di Januari 2026, e fecha stipula pa e introduccion di un salario minimo pa ora y e Jeugdminimumloon, Parlamentario Shailiny Tromp-Lee ta expresa su preocupacion serio riba e silencio total di parti di Gobierno y e falta di preparacion pa e cambionan laboral crucial aki.
Cambio di ley pa introduci e salario minimo pa ora entrante 1 di januari 2026 a keda aproba na Parlamento dia 1 di september 2025, y un mocion presenta pa su persona pa introduci jeugdminimumloon entrante 1 di Januari 2026 a haya sosten unanime den Parlamento riba e mesun fecha menciona. E aprobacion di e cambionan aki ta un victoria pa proteccion di nos trahadonan y hobennan riba e mercado laboral. Sinembargo, e implementacion exitoso ta rekeri un plan di trabou detaya, administrativo, legal y, mas importante, comunicativo.
Falta di Campaña di Conscientisacion y Transparencia
Lamentablemente, te dia di awe, no tin ningun campaña di conscientisacion ni informacion a cuminsa. Doñonan di trabou y trahadonan, kendenan mester ta prepara pa e cambionan aki, ta keda sin e informacion y e asistencia preparativo necesario.
E falta di accion aki ta keda un misterio, specialmente mirando cu di dia 13 di oktober 2025 (y a rapela esaki dia 4 di December 2025) mi a dirigi un set di preguntanan detaya por escrito, via Presidente di Parlamento, na Minister Cecilia, caminda mi ta pidi claridad riba entre otro:
E status di e Landsbesluit (decreto) pa introduccion di e jeugdminimumloon.
E plan di trabou detaya pa implementacion (administrativo, legal, comunicativo) pa loke ta trata e jeugdminimumloon.
E fundeshi pa e cifra di 70% cu a wordo menciona den un comunicado como e porcentahe pa stipula e juegdminimumloon.
E plan di comunicacion y control di Departamento di Labor pa loke ta trata e introduccion di un salario minimo pa ora.
E status di e "noodzakelijke uitvoeringsmaatregelen" pa preveni impactonan negativo, manera aumento di prijs of retiro di personal, manera e mocion unanime a urgi. Un luna y mei despues y ainda e preguntanan aki ta sin contesta Segun Parlamentario Tromp-Lee e silencio di Gobierno ta inaceptabel. No por warda te ora cu e ley drenta na vigor pa cuminsa informa y educa nos comunidad. Gobierno tin e obligacion pa mustra e respet debido na Parlamento dor di contesta preguntanan, y na comunidad dor di implementa e ley di un forma responsabel y transparente.
Pesey mes Parlamentario Tromp-Lee ta urgi Minister pa duna cuenta inmediatamente y bin cu e plan di comunicacion y implementacion, pa asina por garantisa cu e introduccion di e salario minimo pa ora y e jeugdminimumloon ta bay corectamente entrante 1 di januari 2026, manera ta stipula y manera nos trahadonan merece.